Bir çoxları çərəzlərin həm doyurucu, həm də faydalı olduğunu düşünərək onları ölçüsüz şəkildə yeyir. Foodinfo.az xəbər verir ki, həkim-endokrinoloq Svetlana Şokur çərəzlərin gündə 30 qramdan artıq qəbul edilməsinin sağlamlığa mənfi təsirlərindən danışıb.

Mütəxəssisin sözlərinə görə, çərəzlər faydalı maddələrlə zəngin olsa da, yağ miqdarı yüksək olduğuna görə çox yeyildikdə artıq enerji yığılmasına səbəb olur. O bildirib ki, hətta qida rasionu balanslı olsa belə, çərəzlərin normadan çox qəbul edilməsi çəki artımına gətirib çıxara bilər. Bu da gündəlik qida rejimini pozaraq insanın maddələr mübadiləsini ləngidə bilir. Həkim vurğulayır ki, bir ovucdan artıq çərəz yemək həm enerji profilini dəyişir, həm də bədənin ehtiyac duymadığı artıq yağ toplanmasına səbəb olur.

Şokurun sözlərinə görə, digər problem çərəzlərdə lifin çoxluğudur. Çərəzlər birdəfəyə çox miqdarda yeyildikdə həzm sistemi bu yükü qəbul etməkdə çətinlik çəkir. Bu zaman mədə ağırlaşması, köp, sancı və ümumi narahatlıq hissi yarana bilər. Mütəxəssisin fikrincə, həzm sistemi zəif olan və ya qida allergiyasına meyilli şəxslər bu məsələdə xüsusilə diqqətli olmalıdır. Çərəzlərin həddən artıq qəbulu bəzi insanlarda allergik reaksiya riskini də artırır.

Həkim sağlamlıq üçün çərəzlərin tamamilə çıxarılmasını yox, sadəcə düzgün miqdarda istifadə edilməsini tövsiyə edir. O qeyd edir ki, çərəzləri gün ərzində kiçik porsiyalarla yemək həm qida dəyərini qoruyur, həm də həddindən artıq yüklənmənin qarşısını alır. Mütəxəssislər bu mövzuda ümumi tövsiyəni belə yekunlaşdırır: çərəz faydalıdır, amma hər faydalı şey kimi onu da ölçülü qəbul etmək lazımdır.