“Sağlam” adı ilə təqdim olunan bəzi qidalar düşündüyünüz qədər faydalı olmaya bilər. Foodinfo.az bildirir ki, həkim-qastroenteroloq Yekaterina Kaşux “PP” (düzgün qidalanma) etiketi ilə satılan məhsulların əslində gizli kalorilərlə zəngin ola biləcəyini açıqlayıb.

Məlumata görə, mütəxəssis qeyd edir ki, “sağlam fast food” anlayışı çox vaxt marketinq hiyləsi kimi istifadə olunur və insanlarda bu cür qidaları məhdudiyyətsiz yemək illüziyası yaradır.
Nəticədə insanlar porsiyanı artırır və fərqinə varmadan adi fast food qədər kalori, duz və yağ qəbul edə bilirlər. Ekspert vurğulayır ki, “PP” ifadəsinin rəsmi və hüquqi tərifi yoxdur və bu sahədə konkret standartlar tətbiq edilmir.

Bu səbəbdən hər istehsalçı və ya ictimai iaşə müəssisəsi bu anlayışı özünə uyğun şəkildə təqdim edir. Bəzi hallarda bu tip yeməklərin porsiyaları böyük olur və istifadə olunan məhsulların keyfiyyəti barədə məlumatlar açıqlanmır. Bu isə istehlakçı üçün real qida dəyərini müəyyən etməyi çətinləşdirir.

Digər tərəfdən, dietoloq Natalya Pavlyuk qəhvənin təsiri ilə bağlı da açıqlama verib. Onun sözlərinə görə, qəhvə ürək-damar xəstəliklərinin, şəkərli diabetin və qaraciyər problemlərinin profilaktikasında müəyyən faydalar göstərə bilər. Lakin kofein bəzi insanlarda təzyiqin yüksəlməsinə, narahatlıq hissinə və asılılığa səbəb ola bilər. Həmçinin bu maddə kalsium, dəmir və sink kimi vacib mineralların mənimsənilməsini zəiflədə bilər.