Dəri mütəxəssisləri günəş ləkələrinin aradan qaldırılması üçün təbii üsullara marağın artdığını bildirir. Ev şəraitində hazırlanan bəzi maskalar dərinin rəng tonunu bərabərləşdirməyə və ləkələrin görünüşünü azaltmağa kömək edir.

Foodinfo.az xəbər verir ki, ən təsirli maskalardan biri qatıq və limon qarışığıdır. Qatıq dərini qidalandırır və yumşaldır, limon isə tərkibindəki turşular sayəsində dəridəki tünd ləkələrin açılmasına kömək edir. Bu maskanın həftədə bir neçə dəfə tətbiqi müsbət nəticə verir.

Digər təsirli vasitə isə cəfəri əsaslı maskadır. Cəfəri dərini təmizləyən və işıqlandıran xüsusiyyətlərə malikdir. Qatıq və bir neçə damcı limonla qarışdırıldıqda, bu maska dərinin daha parlaq və bərabər görünməsinə dəstək olur.

Asiya ölkələrində geniş istifadə olunan düyü maskası da günəş ləkələrinə qarşı effektiv hesab edilir. Düyü dərini ağartmağa və təbii parlaqlıq verməyə kömək edir. Süd ilə birlikdə istifadə edildikdə təsiri daha da artır.

Bununla yanaşı, yalnız maskalar kifayət deyil. Günəş şüalarından qorunmaq üçün gündəlik olaraq günəş kremindən istifadə olunmalıdır. Əks halda, ləkələrin yenidən yaranma riski yüksək olaraq qalır.

Qeyd edək ki, hər bir maskanı tətbiq etməzdən əvvəl dərinin kiçik bir hissəsində yoxlama aparmaq vacibdir. Bu, mümkün allergik reaksiyaların qarşısını almağa kömək edir.