Həddindən artıq qaz (köp) bəzən narahatlıq, qarında şişkinlik və sancı ilə müşayiət olunur. Bu vəziyyətə bəzi qidalar səbəb ola bilər – xüsusilə də həzm zamanı çox miqdarda qaz yaradan və ya bağırsaqda fermentasiya olunan qidalar. 

Foodinfo.az ən çox qaz əmələ gətirən 5 əsas qidanı təqdim edir:

1. Paxlalılar (noxud, lobya, mərcimək və s.)

Bu qidalar oligosaxaridlər adlı şəkər birləşmələri ehtiva edir ki, insan orqanizmində onları parçalayacaq ferment yoxdur. Nəticədə bağırsaq bakteriyaları bu birləşmələri parçalayarkən qaz yaranır.

2. Kələm növləri (ağ kələm, brokoli, gül kələmi, Brüssel kələmi)

Tərkibində kükürdlü birləşmələr və liflər çoxdur. Bu maddələr bağırsaqlarda fermentasiya zamanı qaz əmələ gətirir. Çiy yeyildikdə təsiri daha güclü ola bilər.

3. Süd məhsulları (xüsusilə süd, dondurma, bəzi pendirlər)

Laktoza dözümsüzlüyü olan insanlarda süd məhsulları qaz, köp və ishal yaradır. Bu insanlar üçün bitki mənşəli südlər (badam, yulaf, düyü südü) daha uyğundur.

4. Şəkərli və qazlı içkilər (cola, şirniyyat, süni şirələr)

Tərkibindəki karbon qazı və süni şəkərlər (məsələn, sorbitol) qaz yığılmasını artırır. Çeynənən saqqız da havanın udulmasına səbəb ola bilər.

5. Tam taxıllar və yüksək lifli qidalar (qarabaşaq, yulaf, kəpəkli çörək və s.)

Faydalı olsalar da, bədən bu liflərə tam uyğunlaşmayıbsa, bağırsaqlarda qaz yarana bilər. Birdən-birə çox miqdarda lif qəbul etmək qaz və köpə səbəb ola bilər.

Qaz problemi hər kəsdə ola bilər, amma bəzi qidalar bunu daha da artırır. Bədəni müşahidə etmək və uyğun qidalanma rejimi seçmək bu narahatlığın qarşısını almağa kömək edə bilər.