Səhər yeməyinin gün ərzində həm enerji səviyyəsinə, həm də iştahaya birbaşa təsir etdiyi bildirilir. Mütəxəssislər hesab edirlər ki, səhər qəbul edilən yanlış qidalar insanı daha tez acdırır və gün ərzində həddindən artıq kalori qəbuluna səbəb olur.
Foodinfo.az “Parade” nəşrinə istinadla xəbər verir ki, amerikalı dietoloq Lisa Young səhər yeməyində ən təhlükəli seçimlərdən birinin şəkərlə zəngin hazır səhər lopaları olduğunu bildirib. Onun sözlərinə görə, bu məhsullar ilk anda enerji versə də, qısa müddət sonra qanda şəkərin sürətlə aşağı düşməsinə səbəb olur və nəticədə insan yenidən aclıq hiss edir.
Ekspert qeyd edib ki, bir çox insan reklam olunan “fitnes məhsulları”nı sağlam hesab etsə də, onların əksəriyyətində gizli şəkər və müxtəlif dadlandırıcılar mövcuddur. Bu isə maddələr mübadiləsinə mənfi təsir göstərir.
Lisa Young bildirib ki, səhər yeməyində protein və liflə zəngin qidalar daha düzgün seçim hesab olunur. Yumurta, yulaf, qatıq, toxumlar və təbii meyvələr həm uzunmüddətli toxluq yaradır, həm də enerjinin sabit qalmasına kömək edir.
Dietoloqun sözlərinə görə, səhər yeməyini tamamilə keçmək də yanlış vərdişlərdən biridir. Bu zaman insan günün ikinci yarısında daha çox yeməyə meylli olur və nəticədə çəki artımı riski yüksəlir.
Mütəxəssis əlavə edib ki, səhər saatlarında qazlı içkilər, şokoladlı krem məhsulları və həddindən artıq şirin çay istifadəsi də sağlam qidalanma prinsiplərinə uyğun deyil. Onun fikrincə, düzgün səhər yeməyi həm ürək sağlamlığına, həm də beyin fəaliyyətinə müsbət təsir göstərir.
