Qlütinə həssaslıqdan əziyyət çəkən insanların sayı dünya əhalisinin təxminən 10%-ini təşkil edir. Foodinfo.az Gazeta.ru-ya istinadla xəbər verir ki, yeni araşdırmalar göstərir ki, bu vəziyyətin əsas səbəbi qlütin özü olmaya bilər.
Beynəlxalq tədqiqat qrupu bütün mövcud məlumatları təhlil edərək qlütensiz qidalanmaya qarşı qeyri-çölyak həssaslığı araşdırıb. Nəticələr The Lancet jurnalında dərc olunub.
Qlütinə qarşı həssaslığı olan insanlar qlütin tərkibli qidalar qəbul etdikdən sonra qarında şişkinlik, ağrı, yorğunluq və digər simptomlar yaşayırlar. Lakin onların bağırsaqları çölyakiya xəstəliyinə tutulmur — bu xəstəlikdə qlütin həqiqətən bağırsaqlara zərər verir. Yeni tədqiqat göstərib ki, əksər hallarda narahatlığın səbəbi buğda zülalları deyil, digər amillərdir.
Melburn Universitetinin dosenti və araşdırmanın aparıcı müəllifi Cessika Besikerski bildirib: “Geniş yayılmış inanclara baxmayaraq, QÇH olan insanların əksəriyyəti məhz qlütinə reaksiya vermir”.
O qeyd edib ki, simptomlar daha çox fermentləşən karbohidratlar, buğdanın digər tərkib hissələri və ya insanın orqanizmindən gələn siqnalları qəbul etmə üsulu ilə bağlıdır. Geniş təhlillərdə yalnız ciddi nəzarət altında aparılan təcrübələrdə qlütinə real reaksiya müşahidə olunub, əksər hallarda effekt plasebo ilə eyni olub.
Besikerski əlavə edib: “İrritabl bağırsaq sindromu olan və özlərini qlütinə həssas hesab edən insanlar qlütinə, buğdaya və plaseboya eyni cür reaksiya verirlər. Bu, simptomlara təsir edən amillərin gözləntilər və əvvəlki təcrübələr olduğunu göstərir”.
Tədqiqat müəllifləri vurğulayıblar ki, QÇH bağırsaq və beyin arasındakı əlaqə pozuntularının spektrinə aid edilməli, qlütinlə birbaşa bağlı ayrı bir xəstəlik kimi qəbul edilməməlidir.
