Adətən tərəvəzlərin bütün qida dəyərlərini saxlamaq üçün onları xam şəkildə yemək tövsiyə olunur. Lakin bəzi tərəvəzlər termik emaldan sonra daha faydalı xüsusiyyətlər qazanır. Foodinfo.az Gazeta.ru saytına istinadla xəbər verir ki, mütəxəssislər termik emalın bəzi vitaminlərin və antioksidantların orqanizm tərəfindən daha yaxşı mənimsənilməsinə imkan verdiyini bildirirlər.

Məsələn, pomidor xam halda likopinlə zəngindir, lakin bişirildikdə bu antioksidant sərbəst qalaraq orqanizm tərəfindən daha yaxşı əmilir və pomidorun dadı daha zəngin olur. Yerkökü isə bişirildikdə beta-karotinin əmilimi artır, bu da A vitamininin orqanizm üçün əlçatanlığını yüksəldir. Brokkoli və karnabahar isə yüksək temperaturlu bişirmə zamanı yumşalaraq həzm sisteminə daha az yük verir, amma B və C qrup vitaminlərinin qorunması üçün hazırlıq zamanı temperatur və müddətə diqqət etmək vacibdir.

Termik emal həm də bəzi qıcıqlandırıcı maddələrin miqdarını azaldır ki, bu xüsusilə həssas mədə-bağırsaq sistemi olan insanlar üçün əhəmiyyətlidir. Ekspertlər vurğulayırlar ki, balanslı qidalanma üçün həm xam, həm də bişmiş tərəvəzləri rasiona daxil etmək ən məqsədəuyğundur və bu yanaşma tərəvəzlərin faydalı təsirini maksimum dərəcədə artırır.