Qarabaşaq çayı dünyada sürətlə populyarlaşan sağlam içkilərdən birinə çevrilib. Bir çox insan bu içkini həm faydalı xüsusiyyətlərinə, həm də qeyri-adi dadına görə gündəlik qida rasionuna daxil edir.

Foodinfo.az BB.LV saytına istinadla xəbər verir ki, qarabaşaq çayı adi çay kimi yarpaqlardan deyil, xüsusi qarabaşaq toxumlarından hazırlanır. Bu içkinin istehsalında əsasən “tatar qarabaşağı” adlanan növdən istifadə olunur. Bu toxumlar daha kiçik olsa da, adi qarabaşağa nisbətən daha çox faydalı maddələr ehtiva edir. Qarabaşaq çayının hazırlanması ənənəsi əsrlər əvvəl Çində yaranıb və orada “Ku Çyao” adı ilə tanınır.

Mütəxəssislər bildirirlər ki, qarabaşaq çayı vitamin A, B, E və PP, həmçinin kalium, kalsium, dəmir və sink kimi minerallarla zəngindir. Bu içkidə xüsusilə rutin maddəsi çox olur ki, bu da ürək-damar sisteminə müsbət təsir göstərir. İçki antioksidant xüsusiyyətləri sayəsində həzm sisteminin fəaliyyətini dəstəkləyir, orqanizmin təmizlənməsinə kömək edir və toxluq hissi yaratdığı üçün arıqlamaq istəyənlər tərəfindən də istifadə olunur.

Qarabaşaq çayının tərkibində kofein olmadığı üçün onu günün istənilən vaxtında, hətta yatmazdan əvvəl də içmək mümkündür. Bununla belə, mütəxəssislər qanın laxtalanması yüksək olan şəxslərə və mədə-bağırsaq xəstəliklərinin kəskin mərhələsində olanlara bu içkini ehtiyatla qəbul etməyi tövsiyə edirlər.

Bu çayı hazırlamaq da olduqca sadədir. Bir stəkan su üçün 1–2 çay qaşığı qarabaşaq toxumu kifayət edir. Üzərinə təxminən 90–95 dərəcə isti su əlavə edilərək 2–5 dəqiqə dəmlənir. İçki həm isti, həm də soyuq şəkildə qəbul oluna bilər və bal və ya limonla birlikdə daha xoş dad verə bilər.