Stress və narahatlıq halları bütün dünyada artmaqdadır. Mütəxəssislər bildirirlər ki, düzgün qidalanma psixoloji vəziyyətin stabilləşməsində mühüm rol oynayır və bəzi məhsullar təbii şəkildə əhval-ruhiyyəni yaxşılaşdırmağa kömək edir.

Foodinfo.az “Sever-Press” saytına istinadla xəbər verir ki, psixoloq Denis Vlasov bağırsaq və beyin arasında birbaşa əlaqənin olduğunu bildirib. Onun sözlərinə görə, “xoşbəxtlik hormonu” kimi tanınan serotoninin böyük hissəsi məhz mədə-bağırsaq sistemində sintez olunur. Bu səbəbdən gündəlik qidalanma insanın emosional vəziyyətinə ciddi təsir göstərir.

Mütəxəssis qeyd edib ki, triptofan adlı amin turşusu orqanizmdə serotonin istehsalını dəstəkləyir. Hinduşka əti, banan, tünd şokolad və sərt pendirlər triptofanla zəngin məhsullar hesab olunur.

Denis Vlasovun sözlərinə görə, omeqa-3 yağ turşuları sinir sistemində yaranan gizli iltihabın azalmasına kömək edir. Yağlı dəniz balıqları və qoz bu baxımdan faydalı məhsullar sırasındadır.

Psixoloq əlavə edib ki, ispanaq və balqabaq tumunda olan maqnezium sinir sistemini sakitləşdirən təbii komponent kimi fəaliyyət göstərir. Turş kələm və kefir isə bağırsaq mikroflorasını dəstəkləyərək beyin fəaliyyətinə müsbət təsir göstərir.

Ekspert mürəkkəb karbohidratların da əhəmiyyətini vurğulayıb. O bildirib ki, bu məhsullar qanda şəkərin səviyyəsini sabit saxlayır və əhval dəyişikliklərinin qarşısını almağa kömək edir.

Mütəxəssis düzgün qidalanmanın stress və gündəlik gərginliyi azaltmağa yardım etdiyini desə də, ağır psixoloji problemlər zamanı həkim nəzarətinin vacibliyini də xatırladıb.