Sağlam həyat tərzi sürənlər üçün düzgün ət seçimi mühüm əhəmiyyət daşıyır. Foodinfo.az NEWS.ru saytına istinadla xəbər verir ki, nutrisioloq Veronika Qusakova hinduşka ətini sağlam qidalanma üçün ən ideal seçim adlandırıb.

Mütəxəssisin sözlərinə görə, hinduşka əti yüksək mənimsənilmə qabiliyyəti və zəngin amin turşusu tərkibi ilə seçilir. Bu ətin zülalı təxminən 95 faiz səviyyəsində mənimsənilir ki, bu göstərici toyuq və mal ətindən daha yüksək hesab olunur. Hinduşka bütün əvəzolunmaz amin turşularını ehtiva edir və bu baxımdan təbii çoxvitamin kompleksi ilə müqayisə olunur.

Qusakova qeyd edir ki, hinduşka triptofan amin turşusu ilə zəngindir. Triptofan serotonin və melatonin hormonlarının sintezində iştirak edir, bu isə axşam saatlarında rahatlamağa və daha keyfiyyətli yuxuya kömək edə bilər. Eyni zamanda, ətin tərkibində B qrupu vitaminləri, eləcə də selen və sink mövcuddur. Bu maddələr maddələr mübadiləsini, sinir sistemini və immun müdafiəni dəstəkləyir.

Mütəxəssisin fikrincə, daha yağlı ət növlərinə alternativ olaraq hinduşka gündəlik rasionda həm sağlam, həm də balanslı seçim ola bilər.