Qida rasionunda duzun həddindən artıq istifadəsi sümüklərin sağlamlığı üçün ciddi təhlükə yaradır.

Foodinfo.az bildirir ki, “GUTA Klinik”in endokrinoloqu İrina Zyatikova duzun orqanizmdəki mineralların balansını pozduğunu və sümüklərin zəifləməsinə səbəb olduğunu vurğulayıb.

Mütəxəssisin sözlərinə görə, bir çox insan gündəlik duz normasını fərqinə varmadan dəfələrlə aşır. Çünki duz təkcə yeməklərə əlavə edilmir, o həm də kolbasa, sosiska, sous, pendir, yarımfabrikat məhsullar və hətta çörək kimi gündəlik qidalarda da gizli şəkildə mövcuddur.

Zyatikova qeyd edib ki, Ümumdünya Səhiyyə Təşkilatının tövsiyəsinə əsasən, bir insan gündə maksimum 5 qram duz qəbul etməlidir. Lakin bu miqdarın aşılması nəticəsində orqanizm kalsium və digər mühüm mineralları daha sürətlə itirir, bu isə sümüklərin strukturunda dəyişikliklərə gətirib çıxarır.

Ekspert bildirib ki, duzun artıq istifadəsi sümüklərdə remodelləşmə prosesini – yəni köhnə hüceyrələrin yeniləri ilə əvəz olunmasını – pozur. Bu da osteoporoz riskini artırır və sümüklərin kövrəkləşməsinə səbəb olur.

Həkim sonda tövsiyə edib ki, yeməklərdə duzun miqdarını azaltmaq, təbii ədviyyatlardan və limon, ot qarışıqları kimi alternativlərdən istifadə etmək sümüklərin möhkəm qalmasına və ümumi sağlamlığın qorunmasına kömək edir.