Qəhvənin faydaları qədər zərərləri də gündəmə gəlməkdədir. Foodinfo.az xəbər verir ki, İtaliyanın Milan Universitetinin sinir sistemi üzrə mütəxəssisi doktor Lucia Romano “La Repubblica” qəzetinə verdiyi açıqlamada bu içkinin təsirlərindən danışıb.

O qeyd edib ki, gündə 3 fincandan artıq qəhvə yuxu ritmlərini poza bilər. Xüsusilə axşam saatlarında içilən kofein tərkibli içkilər melatoninin ifrazını azaldır.
Bu da yuxusuzluq və yuxu keyfiyyətində ciddi enişə səbəb olur. Lucia Romano əlavə edib ki, bəzən insanlar yuxusuzluqla mübarizə üçün səhər yenidən qəhvə içir və bu dövr təkrarlanır.

İtaliyada aparılan bir araşdırmaya görə, gecə qəhvə içənlərin 62%-də yuxu pozğunluğu aşkarlanıb. Doktorun fikrincə, gündə maksimum 2 fincan və günorta saatlarına qədər olan istifadə sağlam hesab edilir. O həmçinin, kofeinsiz alternativlərdən və bitki çaylarından istifadəni tövsiyə edir. Qəhvə asılılığı olan insanlarda narahatlıq, ürək döyüntüsü və gərginlik daha çox müşahidə olunur.

Lucia Romano qeyd edib ki, qəhvənin istifadəsi şəxsi dözümlülüyə əsaslanmalıdır.