Bəzi qidalar saçların zəifləməsinə və tökülməsinə səbəb ola bilər. Foodinfo.az “Чемпионат” nəşrinə istinadla xəbər verir ki, bu barədə dermatoveneroloq və trixoloq Oleg Buçarov açıqlama verib.

Mütəxəssis bildirir ki, xüsusilə sürətli şəkərlər – şirniyyatlar – insulin səviyyəsində kəskin dəyişikliklərə səbəb olur. Bu isə genetik meyilli insanlarda androgen tipli saç tökülməsini gücləndirə bilər. Hormonal balans pozulduqda saç follikulları zəifləyir və zamanla fəaliyyətini dayandıra bilər.

Bundan əlavə, fastfud kimi bərk yağlarla zəngin qidalar damar sistemində iltihab yaradır, qan dövranını zəiflədir və saç köklərinin qidalanmasını pisləşdirir. Bu cür qidalar həm də sərbəst radikalların yaranmasına səbəb olaraq hüceyrələrə zərər verir.

Alkoqol, həddindən artıq çay və qəhvə də mənfi təsir göstərir. Onlar orqanizmdə faydalı maddələrin mənimsənilməsini çətinləşdirir və sinir sistemini həddindən artıq stimullaşdıraraq saçın böyümə dövrünü poza bilər. Həmçinin, bəzi insanlarda qlüten və ya laktoza həssaslığı olduqda taxıl və süd məhsulları baş dərisində iltihab, qaşınma və kəpək yaradaraq saç tökülməsini artırır.

Həkim vurğulayır ki, artıq çəki də maddələr mübadiləsini pozaraq saç sağlamlığına mənfi təsir edir. Lakin saç tökülməsi yalnız qidalanma ilə bağlı olmaya bilər – səbəblər müxtəlifdir. Buna görə də belə problem yarandıqda vaxt itirmədən mütəxəssisə müraciət etmək tövsiyə olunur.