Uşaqların enerji içkilərindən istifadəsi ilə bağlı ciddi xəbərdarlıq edilib. Foodinfo.az xəbər verir ki, “Krasnodar xəbərləri”nə danışan terapevt və həzm sistemi üzrə mütəxəssis Tatyana Zaytseva uşaqların orqanizminin inkişaf mərhələsində olduğunu, buna görə də ürək və sinir sisteminin bu cür içkilərə xüsusilə həssas olduğunu bildirib. Məlumat Sports.kz tərəfindən yayılıb.

Mütəxəssis qeyd edib ki, enerji içkilərini tez-tez və uzun müddət qəbul edən uşaqlarda psixi və sinir sistemi ilə bağlı kəskin pozuntular yarana bilər. Onun sözlərinə görə, belə içkilər panik ataklara, yüksək həyəcan hissinə və depressiya əlamətlərinin formalaşmasına səbəb ola bilər.

Zaytseva enerji içkilərinin uzunmüddətli təhlükələrini də sadalayıb. O bildirib ki, davamlı istifadə ürək ritminin pozulmasına, təzyiqin yüksəlməsinə və həddindən artıq gərginliyə yol açır. Bundan başqa, infarkt riski artır, çəki artımı və şəkərli diabet ehtimalı yüksəlir.

Mütəxəssislər bildirirlər ki, uşaqların sağlamlığı üçün bu cür içkilərdən tam uzaq durması və maye ehtiyacının su, təbii şirələr və uyğun içkilərlə təmin edilməsi daha məqsədəuyğundur.