Hazır qidaların və içkilərin plastik qabda saxlanması artıq adi hala çevrilib. Foodinfo.az bildirir ki, bəzi plastik qablar tərkibindəki kimyəvi maddələrlə orqanizm üçün təhlükə yarada bilər. Xüsusilə “BPA” (bisfenol A) adlı maddə hormon sisteminə müdaxilə edə bilər. Bu maddə temperatur artdıqca qidaya daha çox keçə bilər və uzunmüddətli istifadədə xərçəng, sonsuzluq və piylənmə riskini artırır. Əsasən isti yeməkləri plastik qabda saxlamaq və ya mikrodalğada isitmək risklidir.

Həmçinin, turşulu meyvə şirələri və ya ketçup kimi məhsullar plastiklə reaksiyaya girə bilər. Təhlükənin qarşısını almaq üçün "BPA-sız" (BPA-free) qeyd olunan qablar seçilməlidir. Şüşə və ya paslanmayan polad qablar plastik alternativlərə görə daha təhlükəsizdir. Uşaq qidaları üçün istifadə edilən plastik qablar isə xüsusi nəzarətdən keçirilməlidir.

Ekoloji baxımdan da plastik qabların istifadəsi ətraf mühit üçün mənfi nəticələr doğurur. Qidanın təhlükəsizliyi yalnız tərkibinə deyil, saxlanma şəraitinə də bağlıdır. Sağlam qidalanma yalnız təmiz qidalarla deyil, onların düzgün qablaşdırılması ilə mümkündür.