Ev şəraitində hazırlanan konservlər bir çox ailələrin qış üçün sevimli ehtiyatıdır. Lakin onların düzgün şəkildə hazırlanması sağlamlıq baxımından böyük əhəmiyyət daşıyır. Foodinfo.az xəbər verir ki, diyetoloq Natalya Pavlyuk ev konservlərində qabarcıqların, bulanıqlığın və yad qoxunun yaranmasının təhlükəli göstərici olduğunu bildirib.

Mütəxəssisin sözlərinə görə, bankadakı qabarcıqlar məhsulun içərisində qaz əmələ gəlməsindən xəbər verir ki, bu da bakteriyaların çoxalması deməkdir. Bu cür hallarda konservi istifadə etmək qətiyyən məsləhət görülmür. Pavlyuk qeyd edib ki, konservin içi şəffaf olmalı, suyu və ya şirəsi təmiz görünməlidir, həmçinin məhsulun qoxusu təbii və təzə qalmalıdır.

Diyetoloq vurğulayıb ki, konserv hazırlayarkən əsas qayda təmizliyə riayət etməkdir. Bütün tərəvəz və meyvələr sirkə və ya qaynar su ilə yuyulmalı, bankalar isə əvvəlcədən sterilizasiya olunmalıdır.

O əlavə edib ki, qapaqların bərk bağlanmaması və ya hava keçirməsi bakteriyaların yaranmasına şərait yaradır. Buna görə də, konserv hazırlayarkən qabların möhkəm bağlandığına əmin olmaq vacibdir.

Pavlyukun sözlərinə görə, ev şəraitində təhlükəsiz konserv hazırlamaq istəyənlər hər il yeni bankalardan və keyfiyyətli məhsullardan istifadə etməlidirlər. O xəbərdarlıq edib ki, əgər konservdə şübhəli əlamətlər müşahidə olunarsa, onu dərhal atmaq lazımdır — çünki belə qidalar ciddi zəhərlənməyə səbəb ola bilər.