Yay aylarında zirzəmidə saxlanılmış turşular sağlamlıq üçün təhlükə yarada bilər. Foodinfo.az bildirir ki, bu barədə “Gemotest” laboratoriyasının qastroenteroloqu Yekaterina Kaşux “RT” telekanalına açıqlamasında xəbərdarlıq edib.
Həkimin sözlərinə görə, ev şəraitində hazırlanan konserv məhsulların istifadə müddəti onların növündən və hazırlanma üsulundan asılı olaraq bir ildən iki ilə qədər dəyişə bilər. Bu səbəbdən istifadə etməzdən əvvəl məhsullar diqqətlə yoxlanılmalıdır.
Kaşux xüsusilə botulizmin təhlükəsinə diqqət çəkib. O bildirib ki, Clostridium botulinum bakteriyasının sporları hava olmayan və otaq temperaturuna yaxın şəraitdə toksin ifraz etməyə başlayır. Bu isə düzgün yuyulmamış tərəvəz və meyvələrin konserv bankalarına düşməsi ilə baş verə bilər.
Mütəxəssis qeyd edib ki, bu toksinlər şişmiş qapaq, buludlu duzlu su və bankada hava qabarcıqları ilə özünü göstərə bilər. Belə bankaların heç açılmadan dərhal atılması tövsiyə olunur.
O əlavə edib ki, çatlamış və ya deformasiya olunmuş bankalar da təhlükəlidir, çünki zərərli hissəciklər içəriyə daxil ola bilər.
Həkim eyni zamanda bankada tərəvəzlərin rənginin dəyişməsi, suyun səthində köpük və kif əmələ gəlməsi, dibdə çöküntü olması kimi hallarda həmin turşunun istehlak edilməsinin yolverilməz olduğunu bildirib.
Kaşuxun sözlərinə görə, botulizmin adekvat müalicəsi olmadıqda ölüm riski olduqca yüksəkdir və bu təhlükə hətta xəstəxana şəraitində belə tam aradan qaldırılmır.
Mənbə: RT
