Bal çox zaman sağlamlıq simvolu kimi təqdim edilsə də, şəkərli diabet xəstələri üçün ciddi risk daşıya bilər. Onun tərkibində təbii şəkərlər olan fruktoza və qlükoza yüksək miqdarda mövcuddur. Foodinfo.az bildirir ki, bu maddələr qan şəkərinin sürətli artmasına səbəb ola bilər və insulin balansını poza bilər. Balın qida dəyəri yüksək olsa da, onun glisemik indeksinin də yüksək olduğu unudulmamalıdır.

Xüsusilə tip 2 diabet xəstələri bu məhsulu pəhrizlərinə əlavə etməzdən əvvəl həkimlə məsləhətləşməlidirlər. Bəzi insanlar balın "təbii" olması səbəbilə təhlükəsiz olduğunu düşünsə də, təbii şəkərlərin də insulinə təsiri süni şəkərlərlə oxşardır. Araşdırmalar göstərir ki, bal qəbul etdikdən sonra bəzi diabet xəstələrində hiperglisemiya halları müşahidə olunub. Üstəlik, fərqli bal növlərinin tərkibi dəyişkən olduğundan onların orqanizmə təsiri də fərqli ola bilər.

Balın tərkibində olan antioksidantlar faydalı hesab olunsa da, şəkər balansı pozulmuş şəxslər üçün bu fayda arxa planda qalır. Mütəxəssislər diabet xəstələrinin balı tamamilə rasiondan çıxarmasalar belə, ciddi miqdarda məhdudlaşdırmalarla istifadə etmələrini tövsiyə edirlər.

Təbii məhsul olması onu "zərərsiz" etmir, əksinə, dozaya diqqət edilmədikdə ciddi fəsadlara yol aça bilər. Belə hallarda alternativ şirinləşdirici vasitələrdən istifadə daha məqsədəuyğundur.