Maqnezium insan orqanizmi üçün həyati əhəmiyyət daşıyan əsas minerallardan biridir. Xüsusilə ürək-damar sisteminin stabil işləməsində və ritm pozğunluqlarının qarşısının alınmasında mühüm rol oynayır.

Foodinfo.az xarici mediaya istinadla xəbər verir ki, mütəxəssislər maqneziumun əzələ spazmlarının qarşısını almaq, sinir sisteminin normal fəaliyyətini təmin etmək və qan damarlarını genişləndirərək təzyiqi tənzimləmək kimi vacib funksiyalara malik olduğunu bildirirlər. Bu mineralın çatışmazlığı isə ürək ritminin pozulmasına və ümumi zəifliyə səbəb ola bilər.

Araşdırmalara görə, orqanizm gündə təxminən 350 mq maqneziuma ehtiyac duyur və bu maddə bədəndə sintez olunmadığı üçün qida vasitəsilə qəbul edilməlidir. Maqnezium çatışmazlığının əsas səbəbləri arasında balanssız qidalanma, stress, intensiv fiziki yüklənmə, spirtli içkilərin qəbulu, həmçinin bəzi xəstəliklər və dərmanlar yer alır.

Çatışmazlığın ilkin əlamətləri kimi halsızlıq, başgicəllənmə, ürəkdöyünmə, iştahasızlıq və ürəkbulanma qeyd olunur. Uzunmüddətli çatışmazlıq isə yuxu pozğunluğu, əsəbilik, yaddaş zəifləməsi, əzələ qıcolmaları və baş ağrıları ilə özünü göstərə bilər.

Maqneziumla zəngin qidalar arasında kakao, badam, ispanaq, keşyu, soya südü, kartof, qatıq, qəhvəyi düyü, banan, qızılbalıq, tam taxıllı çörək və brokoli xüsusi yer tutur. Mütəxəssislər gündəlik rasionda bu məhsullara yer verməklə maqnezium balansını qorumağın mümkün olduğunu vurğulayırlar.

Qeyd olunur ki, düzgün və müxtəlif qidalanma maqnezium çatışmazlığının qarşısını almaqda ən effektiv üsullardan biridir və ürək sağlamlığının qorunmasına mühüm töhfə verir.