Sağlam həyat tərzi axtarışında olan bir çox insan qazlı içkilər və qəhvə əvəzinə bitki çaylarına üstünlük verir. Bu seçim ilk baxışdan faydalı görünsə də, mütəxəssislər ölçüyə diqqət yetirilməsinin vacibliyini vurğulayırlar. Foodinfo.az Life.ru-ya istinadən xəbər verir ki, nutrisiyoloq Olqa Burlakova bitki çaylarından həddindən artıq istifadənin düzgün olmadığını bildirib.

Onun sözlərinə görə, insanlar bitki çayını adi su ilə eyniləşdirsələr də, bu içki əslində müəyyən maddələrin məhlulu sayılır. Mütəxəssis qeyd edir ki, bitki çayları tərkibinə görə maye qida hesab oluna bilər. Bildirilir ki, bu cür çaylar bəzən gizli şəkər mənbəyi ola və gündəlik su qəbulunu azalda bilər. Nəticədə orqanizm kifayət qədər adi su almadıqda balans pozula bilər.

Burlakova vurğulayır ki, bitki çayları tamamilə zərərli deyil, sadəcə ölçülü şəkildə içilməlidir. Mütəxəssislər gün ərzində əsas maye mənbəyinin yenə də təmiz su olmasını tövsiyə edirlər. Mövzu ilə bağlı digər bir fikir isə şirin qidaların təsiri ilə əlaqəlidir. Bildirilir ki, endokrinoloq və dietoloq Natalya Qorbunova şirin məhsullardan sonra yaranan ani enerji artımının tez-tez yorğunluqla əvəz olunduğunu açıqlayıb.

Onun sözlərinə görə, qan şəkərinin yüksəlməsinə cavab olaraq orqanizm çox miqdarda insulin ifraz edir. Bu proses şəkərin sürətlə enməsinə, halsızlıq və əsəbilik hissinə səbəb ola bilər. Mütəxəssislər tövsiyə edirlər ki, həm bitki çayları, həm də şirin içkilər gündəlik rasionda balanslı şəkildə yer almalıdır. Düzgün seçim və ölçü sağlam həyat tərzinin əsas şərtlərindən biri hesab olunur.