Şəkərli diabet bədəndə karbohidrat mübadiləsinin pozulması ilə əlaqəli xroniki bir xəstəlikdir. Xəstəlik zamanı qanda qlükoza səviyyəsi yüksəlir, çünki insulin çatışmazlığı və ya onun fəaliyyətinin pozulması səbəbindən bədən qlükozadan səmərəli istifadə edə bilmir.
Foodinfo.az xəbər verir ki, bu barədə endokrinoloq Lada Fedina məlumat verib.
Onun sözlərinə görə, şəkərli diabetin müalicəsinin əsas komponentlərindən biri terapevtik qidalanmadır ki, bu da qanda qlükoza səviyyəsinə nəzarət etməklə həyata keçirilir. Şəkərli diabet xəstələri üçün pəhriz zülallar, yağlar və karbohidratlar baxımından balanslaşdırılmış olmalıdır. Karbohidratlar gündəlik rasionun 50-60%-dən çox olmamalı, həmçinin aşağı qlisemik indeksə malik olmalıdır.İstehlak olunan yağ və zülalın miqdarına da nəzarət etmək vacibdir.
Un məmulatları, konfet və digər şirniyyatların tərkibində çoxlu karbohidratlar var ki, bu da qanda qlükoza səviyyəsinin kəskin artmasına səbəb ola bilər. Tərkibində fruktoza və ya şəkər əvəzediciləri olan "diabetik" qidalar da qanda qlükoza səviyyəsini yüksəldə bilər və ehtiyatla istifadə edilməlidir.
Diabet üçün məqbul şirniyyatlardan danışırıqsa, o zaman qanda qlükoza səviyyəsini tədricən artıran aşağı qlisemik indeksi olan qidaları seçməlisiniz. Belə məhsullara tünd şokolad (bir və ya iki dilimdən çox olmamaqla), turşu lavaş, zefir və marmelad daxildir. Onlardan orta həddə istifadə etdikdə qandakı qlükoza səviyyəsinə çox da təsir göstərməyəcək.
Lakin qeyd edək ki, bir məhsulda şəkərin olmaması digər karbohidratların olmaması demək deyil. Məsələn, şəkər əlavə edilməmiş şirənin tərkibində əhəmiyyətli miqdarda karbohidrat ola bilər. Buna görə də, gündə bir stəkandan çox şirələrdən istifadə etsəniz, bu, qanda qlükoza səviyyəsinin kəskin artmasına səbəb ola bilər.
Meyvələr də müxtəlif dərəcədə karbohidratlarla zəngindir, ona görə də kompensasiya edilmiş karbohidrat mübadiləsinə sahib olmaq üçün bunu həmişə nəzərə almalısınız. Eyni zamanda, tərkibindəki liflərə görə giləmeyvələr daha yavaş həzm olunur, bu da qanda qlükoza səviyyəsini daha sabit saxlamağa imkan verir. Bu səbəbdən şəkərli diabet zamanı giləmeyvə yemək və istehlak edilən meyvələrdə karbohidratların miqdarına nəzarət etmək tövsiyə olunur.
Natəvan
