Öskürək bir çox narahatçılığa səbəb olan soyuqdəymənin ən çox görülən simptomlarından biridir. Bəs öskürəyə xeyirli olan qidalar varmı?
Foodinfo.az bu yazıda öskürəyə xeyirli olan qidaları təqdim edir:
Öskürək təxminən xarakterik bir səslə boğazda olan maddələrin xaric edilməsi kimi müəyyən edilə bilər. 3 həftədən az sürəndə kəskin öskürək, 8 həftədən uzun sürəndə isə xroniki adlanır. Öskürməyə başladığımız zaman ətrafımızdan öskürəyə yaxşı olduğu iddia edilən müxtəlif reseptlər eşidirik. Bəs bu reseptlərdə qeyd olunan qidalar öskürəyə həqiqətən yaxşı gəlirmi? İlk öncə qeyd etmək lazımdır ki, öskürəyi azaltmaq üçün istifadə edilən qidaların təsirli olduğunu göstərən elmi araşdırmalar çox azdır.
Ümumdünya Səhiyyə Təşkilatı (ÜST) balı uşaqlarda yuxarı tənəffüs yolu infeksiyası ilə əlaqəli öskürəyi aradan qaldırmaq üçün əlçatan və təhlükəsiz vasitə hesab edir.
Balın öskürəyə təsiri onun bir çox komponentinin birlikdə təsiri ilə bağlıdır. Bunlardan biri də tərkibindəki flavonoid və fenolik turşu ilə antioksidan xüsusiyyətlərə malik olmasıdır.
Böyük Britaniyanın Milli Sağlamlıq Xidməti (NHS) ilıq bal və limon suyunun istifadəsinin öskürəyi aradan qaldırmaq üçün sınaqdan keçirilə biləcəyini bildirdi.
Baldan başqa öskürəyə təsir edən digər qida da ananasdır. Ananasın tərkibində olan bromelain fermentinin öskürəyi yatırtmağa və seliki boşaltmağa kömək etdiyi müşahidə edilmişdir.
Zəncəfilin tərkibindəki aktiv maddələrin boğaz ağrısını aradan qaldırdığına dair bəzi məlumatlar mövcuddur.
Nanədə olan mentol boğaz ağrılarını sakitləşdirməyə və nəfəs almağı asanlaşdırmağa kömək edə bilər.
Nanə, kəklikotu və evkalipt kimi efir yağları ilə zəngin olan bitkilərin öskürəyi aradan qaldırmaq üçün istifadə edildiyi bilinir.
Yeməyin dərman olmadığını xatırlamaq lazımdır. Müəyyən bir istehlak dozası təyin olunmadığı üçün “daha çox olsa yaxşıdır” kimi düşüncələr həddindən artıq istehlak və zəhərlənməyə səbəb ola bilər. Hər bir qidanın öz dozasında istehlakına diqqət yetirilməlidir.
