Yod orqanizmin düzgün işləməsi üçün vacib olan mineraldır, xüsusilə də qalxanabənzər vəzin hormon istehsalında əsas rol oynayır.
Foodinfo.az xəbər verir ki, bu hormonlar beyin və sinir sistemi inkişafı üçün vacibdir. Yod çatışmazlığı, xüsusilə uşaqlarda və hamilə qadınlarda, ciddi sağlamlıq problemlərinə, o cümlədən zehni geriliyə səbəb ola bilər.
Yod çatışmazlığı zamanı qalxanabənzər vəz hormonlarının səviyyəsi azalır, bu isə beyində sinir hüceyrələrinin inkişafını ləngidir. Bu vəziyyət körpələrdə və uşaqlarda öyrənmə çətinliyi, zəif yaddaş, diqqət çatışmazlığı və digər zehni problemlərlə nəticələnə bilər.
Hamiləlik zamanı yod çatışmazlığı isə doğulacaq körpənin intellektual qabiliyyətinin aşağı olmasına və kretinizm adlı ciddi xəstəliyə səbəb ola bilər.
Yod çatışmazlığının qarşısını almaq üçün yodlu duz, balıq, süd məhsulları və dəniz məhsulları kimi qidaların rasiona daxil edilməsi vacibdir.
Bu, həm zehni, həm də fiziki inkişafın dəstəklənməsi üçün önəmlidir.
