Veysəloğlu Şirkətlər Qrupunun təşəbbüsü və təşkilatçılığı ilə biznes icması üçün daha bir təlim keçirilib. “Onlayn nüfuzun idarə edilməsi” mövzusunda olan təlim amerikalı ekspert Sem Mayklson (Sam Michelson) tərəfindən aparılıb. Qabaqcıl Azərbaycan və beynəlxalq şirkətlərin 30-dan çox nümayəndəsi bu maraqlı və düşündürücü master-klasdan faydalanmaq imkanı əldə ediblər.
Master-klass zamanı şirkətlərin/fərdlərin onlayn platformalarda nüfuzu ilə bağlı məsələlər nümunələr əsasında təqdim edilib, problemlərin həlli və rəqəmsal vasitələrdən effektiv istifadə etməklə nüfuzun artırılması istiqamətində fikir mübadiləsi aparılıb. Həmçinin Google platformasında axtarış zamanı şirkətlərin/fərdlərin özlərini düzgün təqdim etməsi ilə bağlı üsullar izah olunub. Sem Mayklson: “Şirkətin onlayn mövcudluğu və şirkət haqqında Google vasitəsilə axtarış edəndə insanların qarşısına çıxan məlumatlar həmin biznesin dayanıqlılığına birbaşa təsir göstərə bilir. Belə ki, sərmayəçilər, iş adamları və potensial əməkdaşlar hər hansı bir şirkət ilə bağlı düşünərkən onlayn axtarışın nəticələri qərar vermələrinə təsir edən əsas amillərdən biri olur”.
Sem Mayklson rəqəmsal nüfuzun idarə edilməsi üzrə qlobal səviyyəli peşəkardır və dünyada aparıcı təşkilatlara və uğurlu bizneslərin rəhbərlərinə konsaltinq xidmətləri verir. O, “Five Blocks” adlı rəqəmsal reputasiyanın idarə edilməsi şirkətinin qurucusu və rəhbəridir. Sem Mayklson həmçinin iki ABŞ patentinin müəllifidir – bunlardan biri özütənzimlənən məlumat bazası və mətnlərin təsnifatı, digəri isə interaktiv rəqəmsal reklam sahəsinə aiddir.
Veysəloğlu Şirkətlər Qrupu pərakəndə, distribusiya, logistika və istehsalat sahələrində fəaliyyət göstərir. Hazırda Şirkətlər Qrupunun 20,000 nəfərdən çox əməkdaşı var. Veysəloğlu Şirkətlər Qrupunun əsas fəlsəfəsi ölkəmizin iqtisadiyyatı və cəmiyyətimiz üçün real dəyər yaratmaqdır. 2022-ci ildə dünyada tanınmış konsaltinq şirkətlərindən biri olan Deloitte şirkətinin Azərbaycanda ilk dəfə olaraq təşkil etdiyi nüfuzlu Best Managed Companies müsabiqəsində Veysəloğlu Şirkətlər Qrupu qaliblərdən biri elan edilib.
