Kifli pendirlər son illər Azərbaycanda da delikates məhsul kimi geniş yayılıb və süfrələrdə tez-tez yer almağa başlayıb. Foodinfo.az bildirir ki, mütəxəssislər bu məhsulun faydalı xüsusiyyətləri ilə yanaşı müəyyən risklər daşıya biləcəyini də vurğulayırlar.

Əfsanəyə görə, Fransada təsadüfən yaranan kifli pendir bu gün artıq dəqiq nəzarət olunan texnologiya ilə istehsal edilir. İstehsal prosesində yalnız təhlükəsiz və toksik olmayan kif mədəniyyətlərindən istifadə olunur ki, bu da məhsulun dadını və teksturasını formalaşdırır. Ağ kifli pendirlər – kamamber və bri – səthində məxməri ağ qatla seçilir və xüsusi Penicillium növləri ilə hazırlanır.

Göy və ya yaşıl kifli pendirlərdə isə damarvari naxışlar məhsulun daxilində formalaşır və daha kəskin dada malik olur. Qırmızı qabıqlı növlər isə səthində bakterial qatın yaratdığı narıncımtıl çalarla fərqlənir. Bu pendirlər zülal, kalsium, A, D, E, K və B qrupu vitaminləri ilə zəngindir və bağırsaq mikroflorasına müsbət təsir göstərə bilər. Bununla belə, gündəlik qəbul miqdarı 50 qramdan artıq olmamalıdır, çünki yüksək yağlılıq və aktiv fermentasiya həzm sistemini yükləyə bilər.

Hamilə qadınlara və immun sistemi zəif olan şəxslərə listeriya riski səbəbindən kifli pendir tövsiyə edilmir. Məhsulda kəskin ammonyak qoxusu, qeyri-adi rəngli ləkələr, yapışqanlıq və ya acı dad yaranarsa, bu onun xarab olduğunun göstəricisidir. Mütəxəssislər bildirirlər ki, kifli pendir yalnız düzgün saxlanma şəraitində və ölçülü istehlak edildikdə həm təhlükəsiz, həm də faydalı delikates hesab oluna bilər.