Xəstəlik dövründə bir çox insanın şirin, duzlu və ya fastfud kimi qidalara daha çox meyl göstərməsi tez-tez müşahidə olunan haldır və bu, həm fizioloji, həm də psixoloji amillərlə əlaqədardır. Bəzən orqanizm ümumiyyətlə qida qəbul etmək istəmir, lakin bəzi hallarda əksinə olaraq iştaha artır və xüsusilə də sağlam hesab olunmayan məhsullara üstünlük verilir. Foodinfo.az cuprum.media saytına istinadla xəbər verir ki, bu vəziyyət insan orqanizminin xəstəlik zamanı verdiyi kompleks reaksiyaların nəticəsidir.

Məlumata görə, iştaha aclıqdan fərqli olaraq daha çox psixoloji vəziyyətlə bağlıdır və xəstəlik zamanı stress, halsızlıq və emosional dəyişikliklər qida seçimlərinə birbaşa təsir göstərə bilər. Mütəxəssislər bildirir ki, fastfud və şirin məhsulların cəlbedici görünməsi onların parlaq dadı, qoxusu və teksturası ilə bağlıdır, çünki bu qidalar ağızda uzun müddət qalaraq dad reseptorlarını daha güclü stimullaşdırır və bu da onları daha “cazibədar” edir. Eyni zamanda belə qidalar tez enerji verdiyi üçün orqanizm onları bərpa dövründə daha çox tələb edə bilər.

Bununla yanaşı, xəstəlik zamanı orqanizmin maye və elektrolit itirməsi də mühüm rol oynayır, xüsusilə hərarət, qusma və ya ishal hallarında duzlu qidalara meyl artar, çünki bədən itirilmiş maddələri tez bir zamanda bərpa etməyə çalışır. Bununla belə, mütəxəssislər xəbərdarlıq edirlər ki, həddindən artıq şirin, duzlu və ya kəskin qidalar boğazı qıcıqlandıra və sağalma prosesini ləngidə bilər, buna görə də belə hallarda daha yüngül, balanslı və asan həzm olunan qidalara üstünlük verilməsi daha məqsədəuyğun hesab olunur.