Gündəlik qidalanma təkcə sağlamlığa deyil, həm də yuxunun keyfiyyətinə birbaşa təsir edir. Son araşdırmalar göstərir ki, bəzi qidalar sinir sistemini stimullaşdıraraq və ya həzmi çətinləşdirərək gecə istirahətinə mənfi təsir göstərir.
Foodinfo.az yuxuya mane olan ən geniş yayılmış qidaları təqdim edir:
– Kofeinli içkilər (qəhvə, qara çay, enerji içkiləri): Beyni oyaq saxlayır, yuxuya getməni gecikdirir.
– Şokolad: Kofein və şəkər qarışığı səbəbindən yuxu ritmini poza bilir.
– Acılı yeməklər: Mədə turşusunu artıraraq narahatlığa səbəb olur.
– Yağlı və ağır yeməklər: Həzm prosesini yükləyir, orqanizmin dincəlməsinə imkan vermir.
– Şirin qidalar və desertlər: Qan şəkərinin sürətli dəyişməsi səbəbilə yuxu tez-tez bölünür.
– Spirtli içkilər: İlk mərhələdə yuxu gətirsə də, dərin və bərpaedici yuxunun qarşısını alır.
Somnoloqlar məsləhət görür ki, yuxu keyfiyyətini qorumaq üçün axşam yeməyi yüngül və asan həzm olunan qidalardan ibarət olsun. Tərəvəz, az miqdarda süd məhsulları və sakitləşdirici təsirli bitki çayları ideal seçim hesab edilir.
Gecə dərin və rahat yuxu üçün günün son saatlarında kofeinli içkilərdən, ağır və yağlı yeməklərdən, həmçinin şirin qidalardan uzaq durmaq vacibdir.
