Enerjili içkilər – adətən kofein, şəkər, B qrupu vitaminləri, taurin və digər stimullaşdırıcı maddələr ehtiva edən içkilərdir. Onlar yorğunluğu azaltmaq, diqqəti artırmaq və fiziki performansı yüksəltmək məqsədilə istehlak olunur. Lakin bu içkilər hər kəs üçün uyğun deyil və bəzi insanlar üçün ciddi sağlamlıq riskləri yarada bilər.
Foodinfo.az xəbər verir ki, ən böyük risk qrupu uşaqlar və yeniyetmələrdir. Onların bədəni kofein və digər stimullaşdırıcı maddələrə qarşı daha həssasdır. Bu maddələr yuxu pozğunluqları, davranış dəyişiklikləri, ürək döyüntüsündə artım, gərginlik və narahatlıq kimi sağımlılıq riski yarada bilər.
Üstəlik, şəkər miqdarı yüksək olan enerjili içkilər uşaqlarda piylənmə və diş çürüməsi riskini artırır.
Enerjili içkilərdəki yüksək kofein miqdarı ürək döyüntüsünü sürətləndirə, qan təzyiqini qaldıra və aritmiya (ürək ritminin pozulması) riskini artıra bilər. Bu, xüsusilə hipertoniya (yüksək təzyiq) xəstələri, aritmiya diaqnozu olanlar, miokard infarktı keçirmiş insanlara aiddir. Bu qrup üçün enerjili içkilər qəfil ürək tutmalarına belə səbəb ola bilər.
Hamiləlik dövründə yüksək kofein qəbulunun körpənin inkişafına mənfi təsir göstərə biləcəyi sübut olunmuşdur. Enerjili içkilər aşağı çəki ilə doğuş, erkən doğuş, uşağın sinir sisteminin inkişafında problemlər riskini artıra bilər.
Bu içkilər bir müddət üçün oyanıqlıq hissi yaratsa da, daha sonra əhval-ruhiyyədə eniş, gərginlik və konsentrasiya pozğunluğu müşahidə oluna bilər. Bu, xüsusilə imtahan dövründə olan tələbələr və uzun saatlar işləyən şəxslər üçün zərərlidir, çünki bu içkilər beyni və bədəni “aldadaraq” həddən artıq yükləyir.
Əksər enerjili içkilər yüksək miqdarda şəkər ehtiva edir. Bu, qan şəkərinin sürətli artması, insulin müqaviməti, artıq çəki və piylənməyə səbəb olur. Diabeti olan şəxslər və bu xəstəliyə meyilli insanlar enerjili içkilərdən uzaq durmalıdır.
