Ürək nahiyəsindən kənarda yaranan ağrılar bəzən təhlükəli ürək xəstəliklərinin ilk əlaməti ola bilər. Foodinfo.az bildirir ki, kardioloqlar nadir və məkrli sayılan spontan koronar arteriya disseksiyası barədə xəbərdarlıq edirlər.

Britaniya Ürək Fondunun məlumatına görə, bu vəziyyət ürəyi qidalandıran arteriyanın daxili qatının qəfil ayrılması nəticəsində yaranır. Bu proses damarda trombun əmələ gəlməsinə və infarkt riskinin artmasına səbəb olur. Xəstəliyin təhlükəsi ondadır ki, çox vaxt yüksək xolesterin və ya yaş faktoru olmayan insanlarda müşahidə edilir. Əksər hallarda problem qəfil və gözlənilmədən ortaya çıxır.

Risk qrupuna əsasən 45–53 yaş arası qadınlar daxildir. Xüsusilə hamiləlik dövründə və ya doğuşdan sonrakı mərhələdə bu risk daha yüksək olur. Statistikaya görə, halların təxminən 80 faizi qadınların payına düşür. Əlamətlər klassik ürək ağrısından fərqli ola bilər.

Ağrı və ya tutulma hissi yalnız sinədə deyil, qol, boyun, çənə, kürək və hətta qarın nahiyəsində də hiss edilə bilər. Bundan əlavə, nəfəs darlığı, ürəkbulanma, soyuq tər, başgicəllənmə və güclü halsızlıq müşahidə oluna bilər. Mütəxəssislər bu əlamətlər yarandıqda vaxt itirmədən təcili tibbi yardım çağırmağı tövsiyə edirlər.