Yoqa həm bədəni, həm də zehni gücləndirən məşq növü olsa da, onun faydalarını artırmaq üçün düzgün qidalanma böyük rol oynayır.

Foodinfo.az xəbər verir ki, mütəxəssislər bildirir ki, yoqadan əvvəl və sonra qəbul edilən qidalar bədənin enerjisini qorumağa, əzələlərin bərpasına və ümumi rahatlığa kömək edir.

1. Yoqadan əvvəl:

Məşqə tam boş mədə ilə başlamaq başgicəllənmə və halsızlıq yarada bilər. Bu səbəbdən, yoqadan 1–2 saat əvvəl banan, xurma, yulaf, alma və ya bir ovuc badam kimi yüngül və tez həzm olunan qidalar məsləhət görülür. 

Həkimlərin sözlərinə görə, ağır və yağlı yeməklərdən uzaq durmaq lazımdır. Bundan əlavə, məşqdən əvvəl kifayət qədər su içmək vacibdir, amma çox miqdarda su qəbul etmək diskomfort yarada bilər.

2. Yoqadan sonra:

Məşqdən dərhal sonra ilk növbədə su içmək bədənin itirdiyi mayeni bərpa etmək üçün vacibdir. Bununla yanaşı, limonlu və ya kokos suyu da faydalı seçimlər hesab olunur. Əzələlərin bərpası üçün yumurta, qatıq, kefir, balıq, mərcimək və tofu kimi zülal mənbələrinə üstünlük verilməlidir. Təzə tərəvəz və meyvələr – ispanaq, avokado, çiyələk, portağal, xiyar isə bədəni vitamin və minerallarla təmin edir.

Mütəxəssislər xəbərdarlıq edir ki, yoqadan dərhal sonra yağlı, şirniyyatlı və duzlu yeməklər qəbul etmək bədənin yüngüllüyünü pozur və faydanı azaldır.

Yoqanın maksimum təsiri üçün məşqdən əvvəl yüngül, sonra isə balanslı və qidalandırıcı menyuya üstünlük verilməlidir.