Bədən temperaturunun 35 dərəcədən aşağı düşməsi hipotermiya adlanır. Lakin yadda saxlamaq lazımdır ki, 36,6 göstəricisi şərtidir — normal temperatur adətən 35,5–37 dərəcə aralığında dəyişə bilər.

Foodinfo.az Sports.kz portalına istinadla xəbər verir ki, məlumatı RT yayıb.

Həkim-terapevt Stanislava Çeçulina izah edib ki, temperaturun aşağı olması bəzi hallarda norma sayıla bilər.

Onun sözlərinə görə, səbəblər bir neçə qrupa bölünür:

1. Yaş və fizioloji xüsusiyyətlər
80 yaşdan yuxarı insanlarda maddələr mübadiləsi zəiflədiyi üçün bədən temperaturu, xüsusilə istirahət və ya yuxu zamanı bir qədər aşağı ola bilər. Həmçinin bədən yağ faizi az olan arıq gənclərdə də temperatur 36,6-dan aşağı ola bilər və bu, normal hesab edilir.

2. Müəyyən xəstəliklər
Hipotireoz (qalxanabənzər vəzin fəaliyyətinin zəifləməsi) zamanı orqanizmdə proseslər ləngiyir və temperatur düşə bilər. Dəmir çatışmazlığı, qidalanma pozuntuları nəticəsində yaranan tükənmə, eləcə də ağır sistem xəstəlikləri — onkoloji proseslər, qaraciyər, böyrək və ağır ürək çatışmazlığı da temperaturun azalmasına səbəb ola bilər.

3. Soyuq təsiri və dərmanlar
Uzun müddət soyuqda qalmaq istiliyin sürətlə itirilməsinə və hipotermiyaya gətirib çıxara bilər. Bundan əlavə, bəzi antidepressantlar, neyroleptiklər və sakitləşdirici preparatlar da temperaturun enməsinə təsir göstərə bilər.

Mütəxəssis qeyd edib ki, temperaturun birdəfəlik 35 dərəcəyə enməsi və insanın özünü normal hiss etməsi ciddi narahatlıq doğurmamalıdır.

Lakin temperatur 35 dərəcədən aşağıdırsa, ölçmə düzgün termometrlə hər iki qoltuqaltında aparılıbsa və isinmə cəhdlərindən (isti çay, yorğan və s.) 1–2 saat sonra da dəyişməz qalırsa, həkimə müraciət etmək lazımdır. Xüsusilə zəiflik, başgicəllənmə, şüurun bulanıqlığı, nitqin ləngiməsi, səbəbsiz çəki itkisi, dərinin quruluğu, saç tökülməsi, titrəmə və ürəkdöyünmə kimi əlamətlər varsa, gecikmək olmaz.