Hər bir yeməyin bişirilmə üsulu onun tərkibindəki qida maddələrinin qorunmasına birbaşa təsir göstərir. Foodinfo.az xəbər verir ki, “SM-Klinika”nın terapevti və nutrisioloqu Olqa Korxova “Gazeta.ru”ya açıqlamasında yeməkləri buxarda bişirməyin insan sağlamlığı üçün ən faydalı üsullardan biri olduğunu bildirib.

Mütəxəssis qeyd edib ki, buxarda bişirmə zamanı tərəvəzlər və digər məhsullar həm öz parlaq rəngini, həm də təbii teksturasını saxlayır. Bu üsul vitamin və mineralların itirilməsini minimuma endirdiyi üçün yeməklərin həm dadı, həm də qida dəyəri daha yüksək olur.

Korxovanın sözlərinə görə, xüsusilə suda həll olan C vitamini və B qrup vitaminləri buxarda bişirmə zamanı qorunub saxlanılır. Halbuki adi qaynatma prosesində bu vitaminlərin böyük hissəsi suya keçir və itirilir. Daha ağır üsul olan qızartma zamanı isə həm faydalı maddələr dağılır, həm də orqanizm üçün zərərli birləşmələr əmələ gəlir.

Ekspert əlavə edib ki, buxarda bişirmə yalnız tərəvəzlər üçün deyil, həm də balıq və toyuq kimi məhsullar üçün çox əlverişlidir. Bu üsulla hazırlanan yeməklər daha yüngül olur, həzmi asanlaşdırır və artıq yağ yığılmasının qarşısını alır.