Çərəzlər qovrulduqda bəzi qida dəyərləri azalır. Xüsusilə yüksək temperaturda qovrulma prosesi bəzi vitamin və yağların quruluşunu dəyişə bilir. 

Foodinfo.az xəbər verir ki, çərəzlərdəki doymamış yağlar qovrulma zamanı oksidləşir. Bu prosesdə yağlar sağlamlıq üçün zərərli sərbəst radikallar əmələ gətirir, bu da ürək xəstəlikləri və iltihaba səbəb olur.

Bəzi çərəzlərdə olan B və E vitaminləri kimi istiliyə həssas vitaminlər qovrulma zamanı qismən parçalanır. Xüsusilə E vitamini antioksidant xüsusiyyətləri ilə tanınır və onun miqdarının azalması çərəzlərin antioksidant təsirini zəiflədir.

Lif və minerallar qovrulma zamanı ciddi dəyişikliklərə uğramır, lakin qida dəyərinin tam qalması üçün çərəzlərin yüksək xodda deyil, daha az istilikdə yüngülvari qovrulması tövsiyə olunur.

Qovrulmuş çərəzlərə çox vaxt əlavə yağ və duz qatılır, bu da onların kalori və natrium səviyyəsini artırır. Bu əlavə maddələr uzun müddət ərzində yüksək miqdarda qəbul edildikdə sağlamlığa mənfi təsir göstərə bilər.