Sağlam şəkildə çəki azaltmaq istəyən şəxslər üçün qidalanma rejiminin düzgün qurulması əsas şərtlərdən sayılır. Qəbul olunan qidaların tərkibi ilə yanaşı, gün ərzində yemək sayı və vaxt bölgüsü də maddələr mübadiləsinə birbaşa təsir göstərir. Foodinfo.az Sports.kz saytına istinadla xəbər verir ki, mütəxəssislərin fikrincə, arıqlamaq üçün əsas məqsəd yemək sayını artırmaq deyil, ümumi kalori azlığı yaratmaq və qidalanma rejimini sabit saxlamaqdır.

Mütəxəssislər bildirirlər ki, maddələr mübadiləsinin sürəti orqanizmin müəyyən müddətdə sərf etdiyi enerji miqdarı ilə ölçülür. Uzun müddət elmi müzakirələrdə tez-tez qidalanmanın maddələr mübadiləsini sürətləndirdiyi iddia edilsə də, son araşdırmalar bunun birbaşa təsirinin olmadığını göstərir. Qidanın həzm olunması zamanı sərf edilən enerji böyük porsiyalarda daha çox olsa da, bu, mütləq arıqlama ilə nəticələnmir.

Araşdırmalara əsasən, çəki azaltmaq istəyənlər üçün gündə 3–4 dəfə qidalanmaq daha məqsədəuyğundur. Bu zaman diqqət yeməklərin sayına deyil, ümumi kalori miqdarına, məhsulların keyfiyyətinə və rejimin sabitliyinə yönəldilməlidir. Həddindən artıq tez-tez və nəzarətsiz qidalanma əks təsir göstərə bilər.

Qidalanmanın günün hansı saatında baş verdiyi də mühüm amildir. “Clinical Endocrinology and Metabolism” jurnalında dərc olunan tədqiqatlara görə, günün ən əsas və kalorili qidasını səhər saatlarında qəbul edən şəxslərdə qan şəkərinin gündəlik orta səviyyəsi daha stabil olur. Axşam saatlarında ağır yeməklər isə qan şəkərinin kəskin dəyişməsinə səbəb ola bilər.

Mütəxəssislər səhər yeməyinin əhəmiyyətini də xüsusi vurğulayırlar. Mütəmadi səhər yeməyi yeyən şəxslərdə piylənmə və ikinci tip şəkərli diabet riski daha aşağı olur, həmçinin beyin fəaliyyəti və ürək-damar sağlamlığı daha yaxşı qorunur. Lakin burada səhər yeməyinin tərkibi həlledici rol oynayır.

Qidalı olmayan, şirin və yağlı məhsullardan ibarət səhər yeməkləri gözlənilən faydanı vermir. Əvəzində zülalla zəngin, mürəkkəb karbohidratlar, lifli məhsullar və faydalı yağlar qəbul etmək gün ərzində toxluq hissini qorumağa kömək edir.

Son illər arıqlamaq istəyənlər arasında fasiləli aclıq rejimi də geniş yayılıb. Bu qidalanma üsulu günün müəyyən saatlarında yemək qəbulunu məhdudlaşdırmağı nəzərdə tutur. Belə yanaşmanın çəki itkisi, qan şəkərinə nəzarət, həzm sistemi və hormonal tarazlıq baxımından müsbət təsirləri olduğu bildirilir.

Ara yeməklərə gəldikdə isə, bu, şəxsi qidalanma tərzindən asılıdır. Kiçik porsiyalarla tez-tez qidalananlar üçün ara yeməklər faydalı ola bilər. Lakin həddindən artıq və nəzarətsiz ara yeməklər çəki artımına səbəb olur. Mütəxəssislər ara yeməkləri əvvəlcədən planlaşdırmağı, meyvə-tərəvəzə üstünlük verməyi və şəkərli məhsullardan uzaq durmağı tövsiyə edirlər.

Ümumilikdə isə sağlam arıqlama üçün əsas şərt balanslı qidalanma, ölçülü porsiyalar və sabit gündəlik rejimdir.