Zəfəran dünyanın ən bahalı və qiymətli ədviyyatlarından biri hesab edilir. O, kulinariya, tibbi, həmçinin kosmetik sahələrdə geniş istifadə olunur.
Foodinfo.az xəbər verir ki, zəfəran tərkibindəki güclü antioksidantlar və digər aktiv maddələrlə bir çox sağlamlıq faydaları təmin edir.
Zəfəran krosin, krositin, safranal və kampferol kimi güclü antioksidantlarla zəngindir. Bu maddələr bədəni sərbəst radikallardan qoruyur və xərçəng, ürək-damar xəstəlikləri və digər xroniki xəstəliklərin riskini azaldır.
Əhval-ruhiyyəni yaxşılaşdırmaq və depressiya simptomlarını yüngülləşdirmək üçün istifadə edilir. Təbii antidepressant təsir göstərir və sinir sistemini sakitləşdirir. Araşdırmalar göstərir ki, zəfəran depresiya ilə mübarizədə bəzi dərmanlarla müqayisədə oxşar təsir göstərir.
Qan təzyiqini aşağı saldığı və pis xolesterolun (LDL) səviyyəsini azaltdığı bildirilir. Bu da ürək-damar xəstəlikləri riskini azaldır və damarların sağlamlığını qoruyur.
Bu bitki həzmi yaxşılaşdırmağa, şişkinlik və həzm problemlərini yüngülləşdirməyə kömək edir. Eyni zamanda, mədə qıcıqlanmalarını azaldır və həzm fermentlərinin fəaliyyətini tənzimləyir.
Zəfəranın tərkibindəki vitaminlər və minerallar (xüsusilə vitamin C) immunitet sistemini gücləndirir və bədəni infeksiyalardan qoruyur.
O, dərini təmizləyir, tonunu yaxşılaşdırır və ona parlaq görünüş verir. Həmçinin sızanaqların azalmasına kömək edir və dəri hüceyrələrini yeniləyir.
Zəfəran görmə qabiliyyətini də yaxşılaşdırır. Araşdırmalar göstərir ki, zəfəran gözlərin hüceyrələrini oksidləşdirici stresdən qoruyur və yaşa bağlı makula degenerasiyası (AMD) kimi göz xəstəliklərinin qarşısını alır.
İltihab əleyhinə və ağrıkəsici xüsusiyyətləri var. O, menstruasiya ağrılarını yüngülləşdirmək və digər ağrıları azaltmaq üçün istifadə edilir.
Zəfəranı çox miqdarda istehlak etmək zəhərlənməyə və digər yan təsirlərə səbəb ola bilər. Gündəlik olaraq 1-1.5 qramdan çox istifadə etmək məsləhət görülmür.
Hamiləlik zamanı yüksək dozada zəfəran qəbul etmək təhlükəli ola bilər, buna görə hamilələr və xüsusi tibbi problemləri olanlar zəfəranı istifadə etməzdən əvvəl həkimlə məsləhətləşməlidir.
