Qaraciyər hər gün orqanizmi qida, hava və ətraf mühit vasitəsilə daxil olan zərərli maddələrdən qoruyur. O, toksinlərin zərərsizləşdirilməsi və bədəndən xaric edilməsi kimi həyati funksiyalar yerinə yetirir. Qaraciyərin fəaliyyəti pozulduqda isə bu, ciddi sağlamlıq problemlərinə səbəb ola bilər.
Foodinfo.az BB.LV saytına istinadla xəbər verir ki, stres, qeyri-sağlam qidalanma, dərman qəbulu, alkoqol və az hərəkətlilik orqanizmdə toksinlərin toplanmasına şərait yaradır. Qaraciyərə dəstək olmaq üçün rasiona aşağıdakı məhsulları daxil etmək tövsiyə olunur.
1. Limon
Səhər oyandıqdan dərhal sonra bir stəkan ilıq suya yarım limon sıxaraq içmək qaraciyərin işini stimullaşdırır. Limon C vitamini və antioksidantlarla zəngindir, fermentlərin aktivliyini artırır və həzm sistemini oyadır.
2. Sarımsaq
Tərkibindəki kükürdlü birləşmələr qaraciyər fermentlərini aktivləşdirərək toksinlərin xaric olunmasına kömək edir. Alisin və selen maddələri əlavə qoruyucu təsir göstərir.
3. Qreypfrut
Antioksidant və vitaminlərlə zəngindir, qaraciyərin təmizlənmə prosesini dəstəkləyir. Lakin bəzi dərmanlarla qarşılıqlı təsir göstərə biləcəyini nəzərə almaq vacibdir.
4. Yaşıl çay
Tərkibindəki katexinlər qaraciyərdə yığılan yağların parçalanmasını sürətləndirir və orqanın normal fəaliyyətinə dəstək olur. Antioksidant mənbəyi kimi gündəlik istifadəsi faydalıdır.
5. Çuğundur
Çuğundur şirəsi qanı təmizləməyə və qaraciyərin detoks prosesinə kömək edir. Tərkibindəki betain öd yollarını qoruyur və qaraciyərin fəaliyyətini dəstəkləyir.
6. Avokado
Faydalı yağ turşuları ilə zəngindir və qaraciyər hüceyrələrini zədələnmədən qorumağa kömək edir.
7. Yaşıl yarpaqlı tərəvəzlər
İspanaq, rukola, kələm, kahı və digər yarpaqlı tərəvəzlər xlorofillə zəngindir. Onlar ağır metalları və kimyəvi maddələri zərərsizləşdirməyə kömək edir.
8. Süd tikanı (rastoropşa)
Silymarin maddəsi sayəsində qaraciyərin bərpasını dəstəkləyir və zərərli birləşmələrin hüceyrələrə daxil olmasının qarşısını alır.
9. Qaragilə və digər giləmeyvələr
Antioksidant təsir göstərərək hüceyrələri sərbəst radikalların zərərindən qoruyur və iltihab riskini azaldır.
Mütəxəssislər qeyd edirlər ki, sağlam həyat tərzi, balanslı qidalanma və kifayət qədər fiziki aktivlik qaraciyərin normal fəaliyyətini qorumağın əsas şərtləridir. Ciddi sağlamlıq problemləri zamanı isə mütləq həkimə müraciət etmək lazımdır.
