Zeytun həm dadı, həm də zəngin tərkibi ilə sağlam qidalanmanın ayrılmaz hissəsi sayılır. Foodinfo.az BB.LV saytına istinadla xəbər verir ki, qara konservləşdirilmiş zeytunlar yüksək kalorili məhsul olmaqla yanaşı, həm doymuş, həm də doymamış yağ turşuları, eləcə də çoxsaylı vitamin və minerallarla zəngindir. Onların tərkibində xolin, E vitamini, K vitamini, C vitamini və PP vitamini ilə yanaşı natrium, kalium, maqnezium, fosfor, kalsium, dəmir, sink və selen kimi vacib elementlər mövcuddur.
Mütəxəssislərin sözlərinə görə, bu maddələr orqanizmdə mühüm funksiyaları yerinə yetirir. Xüsusilə B4 vitamini sinir impulslarının ötürülməsini yaxşılaşdırır, karbohidrat mübadiləsini tənzimləyir və qaraciyəri toksinlərdən qoruyur. K vitamini qan laxtalanması və sümük mübadiləsi üçün vacibdir, C vitamini immun sistemini gücləndirir, PP vitamini isə toxumaların tənəffüsünü yaxşılaşdırır. Bu səbəbdən zeytunun müntəzəm və ölçülü istifadəsi sağlamlığa müsbət təsir göstərir.
Araşdırmalar göstərir ki, zeytunların orta miqdarda qəbulu oynaq, əzələ və diş ağrılarının azalmasına kömək edə bilər, həmçinin öd kisəsində daş əmələ gəlməsi riskini aşağı salır. Bundan əlavə, bu məhsul ürək və damarları möhkəmləndirərək aritmiya, stenokardiya və infarkt riskinin azalmasına dəstək olur. Zeytun eyni zamanda bağırsaqları təmizləyir və orqanizmdən zərərli maddələrin çıxarılmasına kömək edir.
Bununla belə, konservləşdirilmiş zeytunların tərkibində duzun çox olması bəzi hallarda risk yarada bilər. Xüsusilə piylənmə, xroniki böyrək çatışmazlığı və sidik daşı xəstəliyi olan şəxslərə bu məhsul tövsiyə edilmir. Həmçinin öd kisəsi əməliyyatı keçirmiş insanlar üçün güclü ödqovucu təsiri səbəbindən zərərli ola bilər. Hətta sağlam insanlarda belə həddindən artıq istifadə baş ağrısı, ürəkbulanma və halsızlıq yarada bilər.
Mütəxəssislər maksimum fayda əldə etmək üçün keyfiyyətli zeytun seçməyin vacibliyini vurğulayırlar. Yumşaq teksturalı, mat rəngli və təbii, qeyri-bərabər rəngə malik olan zeytunlar daha faydalı hesab olunur. Eyni zamanda, duzlu məhlulda çöküntünün olmaması məhsulun keyfiyyət göstəricilərindən biridir.
