Son illər sağlam həyat tərzi ilə maraqlananlar arasında “sudan sonra ən faydalı içki yaşıl çaydır” fikri geniş yayılıb. Bəs bu iddia nə dərəcədə doğrudur? 

Foodinfo.az xəbər verir ki, yaşıl çay güclü antioksidantlarla, xüsusilə katexinlərlə zəngindir. Bu maddələr hüceyrələri qoruyur, iltihabı azaldır və orqanizmin müdafiə mexanizmini gücləndirir. Araşdırmalar yaşıl çayın maddələr mübadiləsini sürətləndirdiyini, ürək-damar sağlamlığını dəstəklədiyini və xolesterin səviyyəsinin tənzimlənməsinə kömək etdiyini göstərir.

Yaşıl çayın tərkibində olan az miqdarda kofein və L-teanin maddəsi diqqəti artırır, zehni ayıqlığı gücləndirir və yorğunluq hissini azalda bilər. Bu xüsusiyyəti ilə yaşıl çay qəhvəyə daha yumşaq alternativ kimi qiymətləndirilir.

Su orqanizm üçün əvəzolunmazdır və heç bir içki onun yerini tuta bilməz. Yaşıl çay isə şəkərsiz və ölçülü istifadə edildikdə sudan sonra ən sağlam içkilərdən biri hesab edilə bilər. Lakin bu, hər kəs üçün eyni dərəcədə uyğun demək deyil.

Yaşıl çay mədə həssaslığı, reflüks problemi olanlarda narahatlıq yarada bilər. Həddindən artıq qəbul edildikdə isə dəmirin sorulmasını azalda və yuxu pozuntularına səbəb ola bilər.

Dietoloqlar qeyd edir ki, ayran, kefir, şəkərsiz bitki çayları və mineral sular da sağlam içkilər sırasındadır və yaşıl çaya alternativ kimi istifadə oluna bilər.