İctimai yerlərdə tez-tez istifadə olunan birdəfəlik qəhvə stəkanlarının sağlamlıq üçün təhlükə yaradıb-yaratmadığı uzun müddətdir müzakirə mövzusudur. Foodinfo.az xəbər verir ki, sənaye dizaynı və qablaşdırma texnologiyaları üzrə mütəxəssis, RUSBİOTEX Universitetinin dosenti Yuliya Filinskaya RT-yə danışaraq bu stəkanların təhlükəsizliyi barədə geniş izah verib.
Onun sözlərinə görə, qəhvə dükanlarında təqdim olunan adi kağız stəkanlar iki qat materialdan hazırlanır: çöldən karton qat formanın sabitliyini və davamlılığını təmin edir, iç tərəfdəki nazik polimer örtük isə mayenin kartona hopmasının qarşısını alır. Mütəxəssis bildirir ki, bu polimer təbəqə olmasa, karton isti içki ilə təmasda çox kısa müddətdə yumşalar, formasını itirər və stəkan tamamilə dağılaraq içkini əl üzərinə axıdardı.
Filinskaya qeyd edib ki, qida ilə təmas edən bütün polimer məmulatları kimi, kağız stəkanlar da ciddi sınaqlardan keçirilir və yalnız müəyyən temperatur və təmas müddətinə uyğun olduqları halda sertifikatlaşdırılır. Onun sözlərinə görə, isti içkilər üçün icazə verilmiş stəkanların üzərində mütləq xüsusi işarələr olur və bu markalanma onların təhlükəsizliyinə dair əsas göstəricidir. Mütəxəssis əlavə edib ki, polipropilendən hazırlanan stəkanlar 120–130 °C temperaturadək xüsusiyyətlərini saxlayır və bu materialdan həmçinin isti yeməklər üçün nəzərdə tutulan digər qablar da istehsal olunur.
Bununla yanaşı, ekspert bildirib ki, pikniklərdə və müxtəlif tədbirlərdə çox zaman işçilər stəkanları özləri alırlar və məhz burada material seçimi ilə bağlı səhvlər baş verir. Onun sözlərinə görə, nazik plastikdən — xüsusilə polietilenterefatalatdan hazırlanan stəkanlar yalnız sərin və ya maksimum 75 °C-dək olan içkilər üçün uyğundur. Əgər belə stəkanda çay və ya qəhvə qaynar su ilə dəmlənirsə, plastik deformasiya olur, içki tökülə bilər və bu həm yanıq riski yaradır, həm də istifadəçiyə narahatlıq gətirir.
Filinskaya diqqətə çatdırıb ki, polipropilen stəkanların üzərində adətən üçbucaq içində “5”, polietilenterefatalat stəkanların üzərində isə “1” rəqəmi olur və bu işarələr materialın növünü tanımaq üçün ən etibarlı yoldur. O əlavə edib ki, kafe və restoranlardan kənar yerlərdə stəkan alarkən mütləq istehsalçının etiketinə baxmaq lazımdır: orada stəkanın isti içkilər üçün yararlı olub-olmaması açıq şəkildə qeyd edilir.
Mütəxəssis sözlərini belə tamamlayıb: hər bir birdəfəlik stəkanın üzərində çəngəl və qədəh işarəsi mütləq olmalıdır, çünki bu nişan məhsulun qida ilə təmas üçün uyğunluğunu göstərir və istehlakçının təhlükəsizliyini təmin edən əsas göstəricilərdən biridir.
