Son illərdə fermentləşdirilmiş məhsullar sağlam qidalanmada getdikcə daha çox diqqət çəkir. Bu qidalar faydalı bakteriyaların iştirakı ilə təbii çevrilməyə uğrayır və daha faydalı formaya düşür.
Foodinfo.az xəbər verir ki, fermentasiya prosesində qidanın tərkibindəki şəkər və nişasta bakteriyalar tərəfindən parçalanır, nəticədə isə süd turşusu və probiotiklər yaranır. Bu da məhsulu həm daha dayanıqlı, həm də daha sağlam edir.
Gündəlik həyatda ən çox istifadə olunan fermentləşdirilmiş qidalara qatıq, kefir, təbii ayran, kələm turşusu, digər tərəvəz turşuları və kombuça çayı daxildir. Asiya mətbəxində isə miso və tempeh kimi məhsullar geniş yayılıb.
Bu qidalar bağırsaqlardakı faydalı bakteriyaları artırır, həzmi yaxşılaşdırır və şişkinlik ilə qəbizliyi azaltmağa kömək edir.
Bundan başqa, immunitet sisteminin böyük hissəsi bağırsaqlarda yerləşdiyi üçün fermentləşdirilmiş məhsullar bədənin müdafiə gücünü dəstəkləyir.
Məlum olub ki, bəzi insanlar üçün süd ağır həzm olunsa da, eyni südün fermentasiyası ilə hazırlanan qatıq daha rahat qəbul edilir.
Nəticə olaraq, araşdırmalar fermentləşdirilmiş məhsulların bağırsaq sağlamlığı üçün faydalı, həzm üçün əlverişli və gündəlik qidalanmada vacib yer tutan qidalar olduğunu göstərir.
