Açıq odda bişirilən kabab çoxları üçün sevimli yemək olsa da, düzgün ət seçilmədikdə sağlamlığa mənfi təsir göstərə bilər. Foodinfo.az “Çempionat” saytına istinadla xəbər verir ki, dietoloq, nutrisioloq Yuliya Kaşapova kabab üçün ən uyğun olmayan ət növləri barədə açıqlama verib.

Mütəxəssisin sözlərinə görə, xüsusilə donuz əti və quzu əti kabab üçün ən sağlam seçim hesab olunmur. Bu ət növləri yüksək yağ tərkibinə malikdir və orqanizm tərəfindən daha çətin həzm olunur. Onların həddindən artıq qəbulu qanda xolesterinin yüksəlməsinə səbəb ola bilər ki, bu da ürək-damar xəstəlikləri riskini artırır. Bundan əlavə, yağlı ətlərin açıq odda bişirilməsi zamanı kanserogen maddələrin əmələ gəlməsi ehtimalı da yüksəlir.

Dietoloq həmçinin hazır şəkildə satılan kabablara da diqqətlə yanaşmağı tövsiyə edir. Belə məhsullarda bəzən keyfiyyətsiz ət, eləcə də dad artırıcı və konservantlar istifadə oluna bilər ki, bu da sağlamlığa əlavə risk yaradır. Ən düzgün seçim isə kababı ev şəraitində, keyfiyyətli ət və təbii ədviyyatlarla hazırlamaqdır.

Alternativ olaraq mütəxəssis daha yüngül ət növlərini tövsiyə edir. Toyuq və hinduşka əti daha az yağlı olduğu üçün kabab üçün uyğun sayılır. Eyni zamanda yağsız mal əti hissələri, xüsusilə bel və lopata hissələri də yaxşı seçimdir. Dəmir və digər faydalı maddələrlə zəngin olan qaraciyər və ürək kimi orqan ətləri də düzgün şəkildə hazırlandıqda qida rasionuna daxil edilə bilər.