Qatıq sağlam və faydalı qida olsa da, onun hansı vaxtda yeyilməsi də orqanizmə təsir baxımından önəmlidir. Günün fərqli saatlarında qəbul edildikdə müxtəlif faydalar verə bilər.

Foodinfo.az xəbər verir ki, səhər saatlarında qatıq yemək bəzən tövsiyə olunmur. Ac qarına qatıq qəbul etmək mədə turşuluğunu artıra və faydalı bakteriyaların təsirini azalda bilər. Buna görə səhər yeməyində qatığın başqa qidalarla birlikdə yeyilməsi daha məqsədəuyğun hesab olunur.

Günorta saatları qatıq üçün ən uyğun vaxtlardan biri sayılır. Bu zaman həzm sistemi daha aktiv olur və qatıqda olan probiotiklər daha yaxşı mənimsənilir. Mütəxəssislər xüsusilə nahardan sonra qatıq yeməyin həzmi asanlaşdırdığını bildirir.

Axşam saatlarında da qatıq faydalı ola bilər. Yüngül şam yeməyi kimi qəbul edildikdə həm toxluq hissi yaradır, həm də gecə həzmi yormur. Bundan əlavə, bəzi mütəxəssislər qatığın yuxu keyfiyyətinə müsbət təsir göstərə biləcəyini qeyd edir.

İdman sonrası qatıq yemək də tövsiyə olunur. Tərkibindəki zülal və minerallar əzələlərin bərpasına kömək edir və bədəni daha tez toparlayır.

Qatıq günün müxtəlif saatlarında yeyilə bilər, lakin ən yaxşı nəticə üçün onu əsas yeməklərlə birlikdə və ya yeməkdən sonra qəbul etmək daha faydalıdır.