"YouTube" əsas səhifəsinin dizaynında dəyişikliklər edib.

Foodinfo.az xəbər verir ki, bundan sonra baxılanların tarixçəsini söndürsəniz və ya yeni hesab açsanız, əsas səhifə tamamilə fərqli görünəcək.

Belə ki, istifadəçilər tövsiyə olunan videolar təklifi əvəzinə, boş bir səhifə görəcəklər.

Dəyişiklik "Google"un dünən elan etdiyi "yeni istifadəçi təcrübəsi"nin bir hissəsidir.

Dediyimiz kimi, "YouTube" baxış tarixçəsini söndürmüsünüzsə, tövsiyə olunan videoları görməyəcəksiniz. Bu isə o deməkdir ki, əsas səhifədə yalnız axtarış paneli, həmçinin "Shorts", "Subscriptions" və "Library" düymələri görünəcək.

Bununla yanaşı, "YouTube" istifadəçiləri tövsiyə edilən videoların əvəzinə belə bir bildiriş görəcəklər: “Sizin baxış tarixçəniz söndürülüb. Sizə uyğunlaşdırılmış ən son videoları əldə etmək üçün istənilən vaxt parametrlərinizi dəyişə bilərsiniz".

"Google" bildirir ki, dəyişiklik tövsiyələr vermək üçün hansı "YouTube" funksiyalarının baxış tarixçəsindən asılı olduğunu aydınlaşdırmaq məqsədini daşıyır. Bu, tövsiyələrə baxmaqdansa, kontent axtarmağa üstünlük verənlər üçün prosesi daha rahat edəcək.

Natəvan