Qarın nahiyəsində piylənmə yalnız estetik məsələ deyil, ciddi xəstəliklərin xəbərçisi ola bilər. Foodinfo.az xəbər verir ki, bu barədə “SberSəhiyyə” tibbi şirkətinin terapevti Anastasya Agaeva açıqlama verib.
Mütəxəssisin sözlərinə görə, abdominal piylənmə həm də visseral və ya mərkəzi piylənmə adlanır. Bu zaman qarın boşluğunda və daxili orqanların ətrafında həddindən artıq yağ toxuması toplanır. Xəstəliyin yaranmasında genetik, hormonal, metabolik və davranış faktorları rol oynasa da, əsas səbəb qəbul edilən kalori ilə sərf olunan enerji arasındakı balansın pozulmasıdır.
Agaeva bildirib ki, böyüklərdə qarın piylənməsinin əsas göstəricisi belin dairəvi ölçüsüdür. Kişilərdə bu göstərici 94 sm-dən, qadınlarda isə 80 sm-dən az olmalıdır. İndeks kütləsi normada olsa belə, bel ölçüsünün artması ciddi xəstəliklərin inkişaf riskini yüksəldir.
Terapevtin sözlərinə görə, qarın piylənməsi insulinə həssaslığın azalmasına, nəticədə şəkərli diabetin yaranma ehtimalının artmasına səbəb olur. Bundan başqa, qanda “pis” xolesterinin yüksəlməsi, “yaxşı” xolesterinin isə azalması aterosklerotik lövhələrin formalaşmasına gətirib çıxarır ki, bu da ürək-damar xəstəliklərinin — hipertoniya, ürək işemiyası, infarkt və insultun riskini artırır.
Həkim əlavə edib ki, abdominal piylənmə onkoloji xəstəliklərin yaranma riskini də artırır. Qadınlarda süd vəzi xərçəngi, kişilərdə prostat xərçəngi, həmçinin hər iki cinsdə yoğun bağırsaq şişlərinin ehtimalı yüksəlir.
Sübhə doğurmayan başqa bir təhlükə isə yuxu apnesidir — yuxuda nəfəsin müvəqqəti dayanması. Həmçinin qadınlarda polikistoz yumurtalıq sindromu, kişilərdə testosteron səviyyəsinin azalması da qarın piylənməsinin nəticələri sırasında göstərilir.
Agaeva tövsiyə edib ki, xəstəliyin qarşısını almaq üçün sağlam həyat tərzi vacibdir. Qidalanma balanslı və müxtəlif olmalı, rasion zülal, faydalı yağlar, yavaş həzm olunan karbohidratlar, mikro və makroelementlərlə zənginləşdirilməlidir. Həkim “Harvard boşqabı” modelindən istifadə etməyi də məsləhət görüb: 22–23 sm diametrli boşqabın yarısı tərəvəz, göyərti, meyvə və giləmeyvələrdən, dörddə biri zülallardan (az yağlı ət, balıq), digər dörddə biri isə mürəkkəb karbohidratlardan (tam taxıllı məhsullar) ibarət olmalıdır.
Bundan başqa, həftəlik ən azı 150 dəqiqə fiziki aktivlik, gündə 7–8 saat yuxu, siqaretdən və spirtli içkilərdən imtina da qarın piylənməsinin qarşısını almaqda mühüm rol oynayır.
