Alça turş və təravətli dadı ilə yaz-yay aylarının sevilən meyvələrindən biridir. Tərkibində bol miqdarda C vitamini, lif, antioksidant və orqanizmə faydalı minerallar olan alça həm dadlı, həm də faydalı meyvə sayılır. Lakin digər qidalar kimi, alçanı da normasında yemək vacibdir. Həddindən artıq istehlakı bəzi sağlamlıq problemlərinə səbəb ola bilər.

Foodinfo.az alçanın faydalarını təqdim edir:

- İmmuniteti gücləndirir: C vitamini ilə zəngindir, xüsusilə soyuqdəyməyə qarşı müqaviməti artırır.

- Həzm sisteminə faydalıdır: Liflə zəngin olduğu üçün bağırsaq fəaliyyətini yaxşılaşdırır.

- Dəri və damar sağlamlığı üçün əhəmiyyətlidir: Antioksidant maddələr sayəsində hüceyrələri qoruyur.

- İştahı tənzimləyir: Aşağı kalorili olduğuna görə arıqlamaq istəyənlər üçün uyğun meyvədir.

Bəs, gündə nə qədər alça yemək olar?

Böyüklər üçün gündə 10–15 ədəd orta ölçülü alça yemək kifayət edir. Bu miqdar həm faydalıdır, həm də turşuluğa görə mədəyə əlavə yük yaratmaz.

Uşaqlar üçün 5–7 ədəd kifayətdir. Uşaqların mədəsi həssas olduğundan, turş meyvələrin miqdarı az olmalıdır.

Alça çox turş meyvə olduğu üçün həddindən artıq istifadəsi qıcqırma, reflü və mədə ağrısı yarada bilər.

Lif və turşuluq çox olduqda bəzi insanlarda ishal və qarın ağrısı müşahidə oluna bilər.

Alçanın turşusu diş minasını zədələyə bilər. Ona görə də alça yedikdən sonra su içmək və ya ağızı yaxalamaq məsləhətdir.

Xüsusilə mədə problemi olan insanlar və uşaqlar alçanı miqdarında və nəzarətli şəkildə yeməlidirlər.