Qanazlığı bir çox hallarda xroniki halsızlıq, tez yorulma və yuxululuqla özünü göstərir və vaxtında qarşısı alınmadıqda sağlamlığa ciddi təsir edir.
Foodinfo.az Sports.kz-ə istinadən xəbər verir ki, həkim-endokrinoloqlar dəmir çatışmazlığı anemiyasının profilaktikasında düzgün qidalanmanın əsas rol oynadığını bildirirlər.

Mütəxəssisin sözlərinə görə, gündəlik rasionda mal və donuz qaraciyəri kimi daxili orqan ətləri xüsusi əhəmiyyət daşıyır. Bundan əlavə, hinduşka əti və dəniz məhsulları da dəmir baxımından zəngin qidalar sırasında yer alır.

Həkim vurğulayır ki, heyvani mənşəli məhsullardan alınan dəmir orqanizm tərəfindən daha asan mənimsənilir. Bitki mənşəli qidalardakı dəmir isə nisbətən zəif sorulur.

Bu səbəbdən ət və subproduktlardan imtina edən şəxslər qidalanmalarına daha diqqətlə yanaşmalıdırlar. Xüsusilə sərt bitkiyeyən qidalanma zamanı dəmir mənbələri düzgün şəkildə birləşdirilməlidir.

Mütəxəssis məsləhət görür ki, paxlalılar, ispanaq və qarabaşaq kimi məhsullar C vitamini ilə zəngin qidalarla birlikdə qəbul edilsin. Bu, dəmirin orqanizmdə mənimsənilməsini artırır.

C vitamini mənbələri sırasında itburnu, nar, xurma və pomidor xüsusilə qeyd olunur. Bu məhsulların qış aylarında süfrədə yer alması qanazlığı riskini azaltmağa kömək edə bilər.

Həkim bildirir ki, balanslı və müxtəlif rasion təkcə anemiyanın deyil, ümumi halsızlığın da qarşısını almaqda vacib rol oynayır.

Mütəxəssislər xatırladır ki, davamlı yorğunluq və zəiflik hissi müşahidə edilərsə, mütləq həkimə müraciət edilməli və özbaşına qida əlavələrindən istifadə edilməməlidir.