Qastroenteroloq və Hemotest laboratoriyasının eksperti Yekaterina Kaşux uşaqların daim şirniyyatla qidalanmasının piylənmə riskini artırdığını bildirib. Həkim vurğulayıb ki, uşaq orqanizmi artıq şəkərə daha həssasdır, çünki onların maddələr mübadiləsi və həzm sistemi hələ tam inkişaf etməyib.

Foodinfo.az bildirir ki, Kaşux RIA Novosti-yə verdiyi açıqlamada qeyd edib ki, peçenye və digər şirniyyat məhsullarının tez-tez və nəzarətsiz şəkildə qəbulu gələcəkdə artıq çəki, maddələr mübadiləsi pozuntuları və digər sağlamlıq problemlərinə səbəb ola bilər.

Bununla belə, həkim şirniyyatları tamamilə qadağan etməyi düzgün hesab etmir. Onun sözlərinə görə, şirniyyat az miqdarda və əsas yeməkdən sonra verildikdə, bu, həm orqanizmə zərər vermir, həm də uşaqlarda sağlam qidalanma vərdişlərinin formalaşmasına kömək edir.

Kaşux valideynlərə tövsiyə edir ki, uşaqlara şirniyyatı mükafat və ya təsəlli vasitəsi kimi təqdim etməsinlər. Bunun əvəzinə, balanslı və nizamlı qidalanma rejimi quraraq, şirniyyata münasibəti düzgün şəkildə tənzimləsinlər. Bu yanaşma həm psixoloji, həm də fiziki sağlamlıq üçün əhəmiyyətlidir.