Xurmanın qış mövsümündə geniş istifadə olunmasına baxmayaraq, hər kəs üçün uyğun olmadığı bildirilir. Foodinfo.az bildirir ki, dietoloq Yelena Solomatina bu meyvənin bəzi insanlarda ciddi həzm narahatlıqlarına səbəb ola biləcəyini açıqlayıb.

Mütəxəssisin sözlərinə görə, xurmanın tərkibindəki yüksək miqdarda şəkər diabet xəstələri üçün ciddi risk yaradır. O, xüsusilə qanda şəkərin nəzarətdən çıxdığı dövrdə diabetiklərin xurmadan tamamilə uzaq durmalı olduğunu vurğulayıb.

Solomatina həmçinin qeyd edib ki, artıq çəki, piylənmə və metabolik sindromdan əziyyət çəkən insanlar üçün də bu meyvə zərərli ola bilər. Onun sözlərinə görə, xurmanın tərkibindəki təbii şəkərlər çəki artımını sürətləndirə və maddələr mübadiləsini pozan prosesləri gücləndirə bilər. Mütəxəssis bildirib ki, həzm sistemi xəstəlikləri olan şəxslər də xurma qəbulunda ehtiyatlı olmalıdır. Xüsusilə mədə turşuluğunun aşağı olduğu qastrit, xora xəstəliyi və tez-tez qəbizlik yaşayan insanlar üçün meyvə əlavə problemlər yarada bilər.

Solomatina xurmanın tərkibindəki taninlərin meyvəyə xüsusi büzücü dad verdiyini, lakin bu maddələrin ağırıq, köp və narahatlıq hissini artıra biləcəyini qeyd edib. Dietoloqun sözlərinə görə, taninlər bağırsaqlarda hərəkəti zəiflədərək qəbizlik riskini daha da yüksəldə bilər. Mütəxəssis həmçinin xurmanın yüngül sidikqovucu təsirə malik olduğunu və buna görə də onu həddindən artıq yeməyin su balansına təsir göstərə biləcəyini əlavə edib. O, risk qrupuna daxil olan insanların xurmanı ya çox məhdud miqdarda istehlak etməli, ya da tamamilə rasiondan çıxarmalı olduğunu bildirib.