Şəkər xəstələrinin hansı meyvələri rahatlıqla yeyə biləcəyi uzun illərdir qida mütəxəssisləri arasında müzakirə olunan mövzulardan biridir. Foodinfo.az xəbər verir ki, xüsusən də yay fəslində çox sevilən qovun bu siyahıda tez-tez gündəmə gəlir və diabet xəstələrinin maraq dairəsinə düşür.

ABŞ-da yerləşən Cleveland Clinic-in endokrinoloqu Dr. Marlene Boehler “Healthline” portalına verdiyi müsahibədə bildirib ki, qovun tamamilə qadağan olunmuş meyvələrdən sayılmasa da, onun qəbulu ciddi şəkildə porsiya ölçüləri ilə məhdudlaşdırılmalıdır. Onun sözlərinə görə, qovunun tərkibində yüksək miqdarda təbii şəkər var və bu, qan şəkərinin qısa müddətdə qalxmasına səbəb ola bilər. Lakin qovun eyni zamanda su və liflə zəngin olduğundan düzgün porsiyada qəbul edildikdə orqanizmi sərinlədici və doyumverici təsir göstərə bilər.
Dr. Boehler bildirib ki, diabet xəstələri üçün əsas məqam meyvənin qlisemik yükünü nəzərə almaqdır, çünki yalnız qlisemik indeks deyil, porsiyanın miqdarı da nəticəyə ciddi təsir edir.

Onun sözlərinə görə, qovunun kiçik bir dilimini gün ərzində başqa sadə karbohidratlarla qarışdırmadan yemək qan şəkərinə ciddi zərər vurmur. Mütəxəssis həmçinin əlavə edib ki, qovunla birlikdə protein və ya sağlam yağ tərkibli qidaların qəbul edilməsi şəkərin sorulmasını bir qədər yavaşlada bilər. Boehlerin vurğuladığı digər məqam isə qovunun yüksək su tərkibinə görə orqanizmdə maye balansının qorunmasına yardımçı olmasıdır. Buna baxmayaraq, diabet xəstələrinin səhər və günorta saatlarında qovun yeməsi daha məqsədəuyğun sayılır, çünki axşam qəbul edilən meyvələr qanda şəkərin uzunmüddətli qalxmasına səbəb ola bilər.

Həkim bildirib ki, qovunu hər gün deyil, həftədə 2-3 dəfə az miqdarda qəbul etmək daha təhlükəsiz seçimdir. Bundan başqa, meyvə şirəsi formasında qovun qəbul etmək tövsiyə olunmur, çünki şirədə liflər az olur və şəkər daha tez sorulur.

Mütəxəssis onu da əlavə edib ki, hər bir diabet xəstəsinin fərdi vəziyyəti nəzərə alınmalı, qidalanma planı həkimlə birlikdə tənzimlənməlidir.
Dr. Boehler diabet xəstələrinə qovunu digər meyvələrlə müqayisədə daha ehtiyatla seçməyi, lakin tamamilə qadağan etməməyi məsləhət görüb.