Daimi olaraq duzlu qidalar istəyirsinizsə, bu yalnız vərdişdən deyil, bəzən orqanizmdəki pozğunluqlardan da xəbər verə bilər. Foodinfo.az xəbər verir ki, Dövlət Maarif Universitetinin Tibb fakültəsi terapiya kafedrasının professoru Stanislav İonov bildirib ki, duz mərkəzi sinir sisteminin normal fəaliyyəti üçün vacibdir, lakin onun həddindən artıq qəbulu metabolizm pozğunluqlarına səbəb ola bilər. Belə pozğunluqlar arasında böyrək və öd daşları xəstəliyi, həmçinin şəkərli diabet göstərilə bilər.

Əgər duzun çox qəbulu sadəcə vərdişdən irəli gəlirsə, onu dəyişmək adətən çətin olmur. Lakin davamlı duz istəyinin olması orqanizmdə su-elektrolit balansının pozulmasına işarə edə bilər. İonov izah edir ki, normal halda daxili mühitin pH göstəricisi 7,2–7,4 olur. Əgər bu tarazlıq alkalik tərəfə meyl edirsə, duz ehtiyacı artır.

Həkim əlavə edir ki, duz istəyi eyni zamanda endokrin pozğunluqların və ya qanda natrium xlorid (NaCl) çatışmazlığının əlaməti ola bilər. Natrium çatışmazlığı mərkəzi sinir sisteminin funksiyasının pozulmasına, refleks fəaliyyətinin zəifləməsinə, halsızlıq, apatiya və davamlı yuxululuğa səbəb ola bilər.

Professor İonov vurğulayır ki, bu pozğunluqlar tez-tez irsi xarakter daşıyır və pH göstəricisinin normadan kənara çıxması bu xəstəliklərin mövcudluğuna işarə edə bilər. Buna görə də belə hallarda endokrinoloqa müraciət etmək və müvafiq müayinələrdən keçmək tövsiyə olunur.